Nongpoh, Nohprah 12: Hapdeng ka jingkhriat tasam jong ka bneng, ki nongïalam ka Hills Farmer Union, Ri-Bhoi District ki la ap pdiang burom ïa u Bah Monlang Thangkhiew ha Umling bad ha CAU, hadien ba u la wanphai na Nongbah Delhi hadien ban ïohpdiang ïa ka Farmers of the Year 2025 Award.
Ha kane ka jingpdiang burom, ki nongïalam ki la pynpaw ka jingsngewkmen bad ai khublei ïa u Bah Monlang namar kane ka khusnam kaba long ka burom ïa u, ïaka iing ka sem, ka shnong ka thaw, ka district bad sha ka jylla hi baroh kawei.
U Bah Alfonbirth Kharsyntiew, General Secretary ka Seng, u ba la leit ruh ban synran lang ïa u Bah Monlang sha Delhi, u la ong ba kane ka award ka dei kaba ai mynsiem kyrpang ïa ki nongrep bad ki samla kiba im na ka rep ka riang. U la ong ruh ba kane ka khusnam,, ka long ka jingai mynsiem ïa kiba bun ban pynleit jingmut shuh shuh ha la ki kam ba ki trei bad ban trei shitom ban poi sha ka jingjop, watla ka dei ka kam rep kam riang.
U la kyntu ruh ïa ki para nongrep ba kin ïeid ïa la ka kam, ban long kiba ïatylli bad ban ïa trei lang ban weng ïa ki jingeh ba ki nongrep ki ïa kynduh man la ka sngi.
Haba kren ha kane ka jingïalang pdiang burom, u Bah Monlang Thangkhiew u la pynpaw ka jingsngewnguh ba kyrpang sha ki nongïalam ka seng kiba la pynkhreh ban pdiang ïa u. U la ong ba kum u nongrep bad u nongri jingri, u shym la poi pyrkhat ban ïohpdiang ïa ka khusnam kaba heh kum kane, hynrei ka jingtrei shitom, ka jingminot bad ka jingïeid jong u ïa la ka kam ka la pynkhraw ïa u haduh ba u la shah jied ban pdiang ïa kane ka khusnam.
