Pdiang burom ka DS Sakwang ïa ki ar ngut ki samla kiba la wanrah burom ha ka 33rd EZJA Championship

Mawkyrwat, Nailur 16 : Ka Dorbar Shnong Sakwang, ka Seng Samla Shnong Sakwang bad ka Sakwang Sports Club mynta ka sngi ka la ïoh ban pdiang burom ïa ki ar ngut ki khun samla jong ka shnong lyngba ka jingwanrah burom jong ki ba ki la jop ha ka jingïalehkai jong ka 33rd East Zone Junior Athletics Championship kaba la long ha Patliputra Sports Complex, Kankerbagh, Patna, Bihar kaba la long naduh ka 10 haduh 12 tarik u ‘Nailur, 2022.
Lah ban kdew ba ki ar ngut ki khun samla jong ka shnong Sakwang kiba la wanrah burom ki dei ka Marqueenless Ramsiej kaba la jop ha ka jingïakhun ha ka jingmareh kaba 5000 meter jong ki khynnah kynthei kiba hapoh 20 snem karta bad ïoh tama ksiar bad u Wolbetstar Ramsiej uba la jop ha ka jingmareh kaba 10,000 meter u ïoh ïa ka tama rupa bad ha ka 5000 meter u ïoh tama rnong. Na kane ka jingjop jong ki la pynïoh burom ym tang ïa ki hi hynrei ïa ka shnong, ka distrik bad ka jylla Meghalaya baroh kawei.
Shuh shuh la ïathuh ruh ba ka jingïoh lad jong ki ban leit mihkhmat sha kane ka lympung ïalehkai ka dei lyngba ka jingbtin lynti jong uwei u nongïamareh thong u bah Jompsingstar Ramsiej ha kaba ma u u la long u nongprat lynti ïa kitei ki khun samla naduh ba ki ki dang don ha la shnong ha kaba ma u u la ju ai shibun ki jinghikai naduh ki rukom mareh bad kumjuh ruh lyngba ki jingbthah ban long kiba peit bha ïa ka por ba haduh katno kin lah ban pyndep ïa kata ka thong ba ki ki thmu.
Kumjuh ruh ha ka jingleit jong ki, ban ïashimbynta hapoh ka Patliputra Sports Complex, Kankerbagh, Patna, Bihar kaba la long naduh ka 10 haduh 12 tarik u ‘Nailur, 2022 ka dei hapoh ka jingïalam jong u Plesanly Synnah uba long Athletic Coach.
Ha ka jingïalang pdiang burom mynta ka sngi, na ka liang jong u Myntri Shnong Sakwang, bah S. Kharjahrin lem bad u Secretary ka Seng Samla Shnong Sakwang bad Secretary jong ka Sakwang Sports Club, u samla Wikobat Kharjahrin ki la pynpaw ka jingaikhublei ba kyrpang halor ka jinglah jong ki ban poi haduh kane ka thong ban ïoh kheit ïa u soh jong ka jingjop. “Watla kim da don eh ïa kita ki jaka kilanmet kiba biang hynrei da ka jingtrei shitom bad aiti lut jong ki ban thom ïa ki rai maw rai dieng ki ïoh ban poi bad kheit ïa u soh uba thiang”, ong u bah Kharjahrin.
Namarkata, kum ka shnong lem bad ki samla jong ka shnong ki la ai ruh ki kyntien jingkyrkhu kyrdoh ïa ki ba kin nangïai trei shitom bad pynleit jingmut ha kane ka kam khnang ba ka lawei jong ki kan long kaba phyrnai. Ki la buh ruh ka jingkyrpad ba kum ki nongïamareh kim dei ban hap ha ki jingpynshoi kiba bun jait kiba lah ban long ka daw jong ka jingpynjot ïa ka jingim jong ki kum ha u drok bad kiwei de ki jait jingdih kiba pynbuaid, namar lada kin ngop ha kum kine ki jingdih ka lawei jong ki ka la long lypa kawei ka dum.
Haba kren na ka liang u samla Wolbetstar Ramsiej bad ka samla Marqueenless Ramsiej ki la pynpaw ka jingaikhublei na ka bynta ka shnong baroh kawei naduh ki longkmie longkpa bad kumjuh ruh ki khun samla kiba la pdiang burom ïa ki mynta ka sngi bad kane ka jingpdiang burom jong ki ka la long ka jingaimynsiem ïa ki ba kin nang kiew shaphrang ha kane ka kam. Ki la ong ruh ba lyngba ka jingaimynsiem jong ki ha kine ki sngi kiba la leit noh baroh ruh ki la long ka jingkyrshan ïa ki ban kin poi sha ka thong jong ka jingjop.
Ha kajuh ka por ki la pynpaw ruh ka jingkhublei ba kyrpang na ka bynta ki nongaibuit kum ki coach kata ïa u bah Jompsing Ramsiej bad u bah Plesanly Synnah kiba la long shisha kita ki nongïalam kiba la pyni shisha ïa kata ka mynsiem kum ki nonghikai ha ki por baroh. “Ngim lah shuh ban siew kylliang ïa ki baroh, hynrei tang ki kyntien jingkhublei, jingkyrkhu kyrdoh ïa ki ba U Blei Un ïai ai ha ki ki met kiba koit kiba khiah khnang ba kin nang lah shuh shuh nangne shakhmat ban btin lynti ïa ngi”, ong u samla Wolbetstar Ramsiej bad ka samla Marqueenless Ramsiej.
Ki la pynpaw ruh ki poi haduh kane ka thong ban ïoh rah ïa ka nam jingjop ym dei ba ki don ïa kata ka madan kaba bha ba kin ïoh kilanmet hynrei tang ha i madan shnong iba rit bad i bym da jlij bad khohruh khohram hynrei da ka jingtrei shitom bad jingïaishah hapdeng ki jingeh baroh ki ïoh pynban ban kheit ïa u soh jong ka jingtrei shitom. Ha kaba ïa dei bad ka jingkilanmet jong ki ki la ïathuh ba jingshim jong ki ïa ka por ban kilanmet ka long beit ha ka por mynstep bad por janmiet kata ha ka por 5 haduh 7 baje mynstep bad 5 haduh 6 baje janmiet.
Ha kaba ïa dei bad ka jingaimynsiem na ka bynta ki khun samla jong ka shnong ka thaw, ka distrik bad ka jylla baroh kawei, u samla Wolbetstar Ramsiej bad ka samla Marqueenless Ramsiej ki la kyntu ba ban long ki nongjop ha kano kano ka jingïaleh ki dei ban long kiba trei shitom, kiba aiti lut, kiba kohnguh, burom ïa ki nonghikai ne ki nongpynïaid bad leh ïa kiei kiei da ka jingïalong kawei bad ïa sngewthuh jingmut namar lymda ymdon ïa kine ki jingpyrshang jong ki ha kano kano ka bynta kin long leh noh ei.
Ha kane ka sngi pdiang burom ïa u samla Wolbetstar Ramsiej bad ka samla Marqueenless Ramsiej la ïadonlang naduh ki ‘riew rangbah ki longkmie longkpa bad kumjuh ruh ki khun samla jong ka shnong Sakwang, South West Khasi Hills District.