Pawnam u samla Bankerlang Myrthong na Mawshynrut ha ka ïalehkai ïa lympat

Nongstoiñ, K’lyngkot 23 : Ki paidbah bad ki riew ieid ïa ki kam ïalehkai bad ki Sengbhalang kum ka HYC, HANM, MYM bad kiwei na ka thaiñ Mawshynrut, ha ka sngi palei ki la mih paidbah ryntih ban pdiang sngewbha pdiang burom ïa u Samla Bankerlang Myrthong ha Zero point Riangdo, hadien ba u la wanphai kum u Nongjop ha ka lymgpung ïa lympat kiba hapoh 18 snem ba la tip kum ka 13 All India Traditional Wrestling Pankration & Federation 2026 kaba la dep long ha Nongbah Delhi ha ka taiew ba la lah.
Hadien ka jingpdiang burom la ïaid rally ha Iew Riangdo bad la pynlong jingïalang leh burom ha Pomdkhar. Ha ka jingïalang la ïoh jingkren na u samla Bankerlang Myrthong, u ba la ong ba u hap ban trei shitom ban pynhiar kilo tang ban ïoh ïakhun bad u la lah ban leh ïa kane bad shah jied na ka State Level ban jop pat ha ka National Level.
U la ïoh saw tylli ki Medal, ar tylli ki trophy bad kiwei na kane ka jingleit ïakhun jong u ha Delhi, Chhattisgarh bad kiwei. U la ong ba u dang pynkhreh mynta ban leit ïakhun ha Vietnam na ka bynta ka ri India ha ka Wrestling jong ki karta iaba hapoh 18 snem.
La ïoh ruh ka jingkren na ka kur Myrthong Riangdo area, na ka HYC Mawshynrut Circle ryngkat ka jingsynran ki nongïalam ka HYC West Khasi Hills District kaba la ïashimbynta lang naduh pdiang burom ha Zero point Riangdo bad haduh ha ïing sah jong u.
U Samla Lumlang Kharsyiemlieh President HYC West Khasi Hills District u la ong, “Phi la wanrah ïa ka burom ïa ka thaiñ, ka Ïing ka sem ka shnong bad ka Ri bad ka Jaitbynriew. To nang san ha la ka sngi bad nga kyntu ba to wat ngop ïa ki kamkai bad jingdih ba sniew. Samla Banker ngi ïohi bun ki riew ïalehkai kim ju sam ïa ka sap ha kiwei kaba u Blei u ai ha ki. Hynrei to don jingthmu ban kyntiew lem ïa kiwei ruh ha ka thaiñ ba kin kiew kum ma phi”.
U Samla Shem Rynñiaw President ka seng MYM u la ong, “Katno nga dap da jingsngewkmen ban tip u Banker un long u khlur ka Ri bad ban pyntyngshaiñ ïa ka Thaiñ. To u Blei un dn ryngkat bad nang kyrshan ba phin nang lah ban kiew shaphrang”.
U Bah Gabriel Sohlang President HANM West Khasi Hills District u la ong, “Ka long ka burom ïa ka ïing ka sem ka shnong ka thaw bad ïa ka dong ka thaiñ sepngi. To nang san bad ïaid shaphrang ryngkat ka thong ban ïakhun ïa ki jingeh bad ban jop ruh”.
Ha kane ka sngi ki paidbah bun byllien naduh ki tymmen ki kro, khunlung khynnah, ki longkmie ki longkpa, ki nongïalam Sport Club bad kiwei kiwei de ki riew rangbah bad samla ka thaiñ Mawshynrut ki la tuid ban ai khublei ïa une u snar lympat briew.