Paw u khynnah 11 mer naka skul shimet ban rung haka kyrdan ba 15 jong ka result SSLC

Nongpoh, Jylliew 13: U wei u khynnah samla u la paw bad wanrah ka nam bad burom ïa kawei ka skul shimet (Private Institution) kaba don ha 11 mer, Mawsmai ha Ri-Bhoi kaba la tip kyrteng kum ka New Era Secondary School hadien ba u la lah ban rung haka thup jong ka Top 20 haka result SSLC ba dang shu pynbna shen da ka MBOSE.
Utei u samla u dei u ba la tip kyrteng kum u Sohan Thapa naka shnong 11 mer Mawsmai u ba la rung ruh haka kyrdan ba 15 jong ka Top 20 bad distinction ha baroh 5 tylli ki subject, u la ioh ruh 100 marks haka subject Science bad u dei ruh u ba heh marks tam haka subject Nepali habaroh ka wei ka jylla bad katkum ka jingtip naki bor pynïaid skul katei ka skul kala pynmih 15 ngut ki samla kiba ïakhun ïaka eksamin SSLC mynta u snem bad 13 ngut naki kila ioh kheit ïa u soh ka jingjop bad 2 ngut kila pheil.
Naka liang ki bor pynïaid skul mynta ka sngi kila pynlong ruh ka jinglehkmen ha skul naduh ki khynnah skul bad ki nonghikai da ka jingïa ot cake, ban pynpaw ïaka jingsarong halor ka nam bad ka burom ba utei u samla u la wanrah watla ka dei ka skul ka bym pat da paw bha bad kaba dang don shibun ki jingduna, bad ha katei ka sngi la pynshit pynshngaiñ ruh da ka jingdonlang u MLA ka Jirang u Bah Sosthenes Sohtun, u M Thapa Headmaster katei ka skul bad kiwei kiwei ki riew rangbah bad nongïalam shnong.
Kum ka dak ka jingai mynsiem halor ka jinglah ban lehbha jong utei u samla haka eksamin SSLC naka liang u MLA ha katei ka sngi u la ai ruh da ka khusnam pisa bad kular ruh ban pynthied da ka laptop ïa u tei u samla kum ka jingai mynsiem ruh ïa kiwei pat ba kin trei shitom bad lehbha haki jingpule jong ki.
Haba kren ha katei ka sngi u MLA ka Jirang u Bah Sosthenes Sohtun u la pynpaw ka jinsngewkmen kaba khraw halor ka jinglah ban lehbha jong utei u samla haka eksamin SSLC ban wanrah ruh ka nam bad burom ïaka skul baroh kawei khamtam ki kmie ki kpa, bad ki nonghikai baka jingtrei shitom jong ki kam shym la long lehnohei watla katei ka skul kam pat ju paw bad dang don hapdeng shibun ki jingduna, hynrei kita ki jingeh bad ki jingduna kim shym la long ka daw pynban katei ka skul kala sei syndon ïa utei u samla ban wan shakhmat haka eksamin SSLC.
Naka liang u MLA u la ai mynsiem ruh ïa kiwei pat ki khynnah kiba dang don hapdeng ka jingpule ha katei ka skul ban bud ïaka nuksa ban trei shitom bad minot haki jingpule jong ki ba kin poi shaka thong kumba ki angnud haka jingim jong ki.