Nongpoh, K’Lyngkot 08: Ka Nongtluh Eri Farmer Association (NEFA) kala shim biang ïaka sienjam ban pynlong ïaka tamasa Ri Kunai la Tynrai kaba 6 ha madan Umden ban pynpaw pyrthei ïaki kolshor tynrai, ki riti ki dustur bala buh naduh u mynbarim, naduh ka shad ka rwai tynrai, ki bam tynrai khamtam u ksai bad ki jaiñ Ryndia kumba ka thaiñ Umden la tip bad ithuh ruh da ka sorkar kum ka shnong u ksai ryndia ne ka Eri Silk Village.
Ha katei ka sngi ka jingrakhe ïaka tamasa Ri Kunai la tynrai la wan ruh ban shim bynta da u Bah Mayral Born Syiem MLA ka Nongpoh kum u kongsan, haka jingdonlang u Bah Balajied Ranee MDC ka Nongpoh, ka kong B Malai President ka NEFA, ki riew rangbah naka Raid Nongtluh bad kiwei kiwei.
Kum ban shu pynpaw hangne ba ka thong hi jong ka NEFA ban pynlong ïa katei ka tamasa ka long ban pynim bad pynneh pynsah ïaki riti dustur tynrai ba bun kila sdang ban duh ban dam noh namar ka jingïaid jong ka por bad ka jingbud tynneng ïaka jong kiwei.
Haba kren ha kane ka sngi u Bah Mayral Born Syiem u la ai ka jingïaroh ïaka NEFA wat haka jingïalam ki longkmie katei ka tamasa kala long kaba seisoh bad ka long shisha ka prokram kaba don jingmut bad shongkun namar ka long kaba donkam ban pynim bad pynneh pynsah ïaki riti dustur bad ki tynrai bala buh naduh u mynbarim bad ki longshuwa manshuwa bad ka long ruh kaba kongsan ban hikai pateng la pateng ban neh ka tynrai deiti lajong ban im ka jaitbynriew bad ka dustur, khamtam ka thaiñ Umden Nongtluh ka dei ruh kaba pawnam halor ka jingpynmih ïaki jaiñ bad kumjuh u khñiang ryndia.
U la ong ruh ba kum u nongmihkhmat hadien ka jingbuddien kaba la kham slem u la pynpaw pat ka jingsngewkmen kaba khraw hadien ba ka sorkar haka 12 tarik Rymphang 2021 kala pynbna bad ithuh syndon ïaka thaiñ Umden Diwon kum ka shnong u ksai Ryndia ne ka Eri Silk Village kaba long ka jingkmen bad ka jingkyrkhu kaba khraw ïaki nongthaiñ jaiñ ban nang kyntiew shuh shuh ïaka kam thaiñ jaiñ bad pynmih ïa u ksai ryndia.
Shuh shuh kumba ka NEFA ka angnud ban pynlong ïa katei ka tamasa man la u snem naka liang u MLA u la kular ruh ban buddien bad ban ïakren sha ka sorkar ba katei ka tamasa yn ithuh noh da ka sorkar ban ioh ruh ki lad jingïarap bapher bapher haki snem ban dang wan.
