Paw nam ki tiar thaiñ siej ka jylla ha ka Republic Day ha Delhi

Shillong, Kyllalyngkot 19: Ka jingriewspah ka Meghalaya ha ka kam thaiñ ïa ki tiar ki tar lyngba ki siej ka la poi shaduh ka thong ba kan ïoh ia ka jingithuh ha ka ri ha ka kyrdan kaba heh tam, ha kaba ki jingthaiñ lyngba ki siej na ka jylla, kila shah jied kum ki ‘At Home’ Invitation Kit ne ki tiar ai sngewbha sha kito kiba la shah khot ha ka jingrakhe ka ri India ïa ka Republic Day kaba 77. ka ban long ha ka 26 tarik Kyllalyngkot 2026.
ïa kine ki tiar ai sngewbha, kaba la shna kyrpang na ka bynta kito kiba la shah khot ban ïashimbynta ha ka Republic Day ha ka jingïalang ka ban long ha Rashtrapati Bhavan ha ka 26 tarik u Kyllalyngkot, ka pyni bad rakhe ïa ka jingriewspah jong kiei kiei kiba la hyndai hynthai jong ka thaiñ shatei lam mihngi ka ri India.
La pynwandur da ka National Institute of Design (NID), Ahmedabad bad kane ka jingai ïa ki kitei ki tiar sha kiba shah khot sngewbha ka dei kaba la pynwan da ka rukom pyrkhat ban ai ïa ki nongshah khot sngewbha da ki jaiñ bad ki tiar tynrai kiba la thaiñ da ki kti na ki 8 tylli ki jylla ka thaiñ shatei lam mihngi ka ri India.
Ka Meghalaya ka la ïoh ïa ka bynta da ka jingdon ïa ki siej jyrngam kiba ai mynsiem ban shna ïa ki knup tynrai ban ïada na u slap, kaba pyni ïa ka jingïadei kaba jylliew ka jylla bad ka kam thaiñ jingthaiñ lyngba ki siej bad ka rukom im kaba ïai neh.
Ki ophisar ki la pyntip ba kane ka jingshna ïa ka jingai sngewbha ka dei ban ai sha kiba shah khot sngewbha bad ban ïoh ïa ka jingshemphang ïa ka rukom thaiñ tynrai jong ka thaiñ shatei lam mihngi da kaba wanrah lang ïa baroh ki bynta na ka jylla Arunachal Pradesh, Assam, Manipur, Meghalaya, Mizoram, Nagaland, Sikkim bad Tripura bad ïa kine la shna lyngba ka jingdon ïa ka jingïatreilang kaba ïajan bha hapdeng ki nongthaiñ kti ka thaiñ bad ka kynhun kyrpang kaba pynwandur pynwandar bha.
Kawei na ki tiar ai sngewbha, ka dei ka “Scroll’ kaba wah ha ki kynroh da kaba pyndonkam ïa ki siej bad ki jingthaiñ ban pyni ïa ki kolshor bad ka riti dustur ba bun jait jongki jylla ka thaiñ shatei lammihngi.
Kane ka jingpynwandur ka dei kaba la pynmih na ki 8 tylli ki jylla ka thaiñ shatei lammihngi, ka jingshna ïa ka Scroll kaba don ryngkat bad ki rong jong ki ksai ka lama ka ri, kaba lam sha ka rukom thaiñ kaba kyrpang da ki kor kaba la pyndonkam salonsar da ki kynthei bad la sop da ka jingthaiñ kti kaba don ïa u paiñpoh, katei ka synduk ka don ïa u shylliah siej uba la thaiñ da ki kynthei ka Tripura, ka kot kaba la shna hi bad ka jingjlih jong ki jingshna lyngba ki siej.
Ha kane ka synduk ne Invitation Box ka ban phah sha ki nongshah khot sngewbha ka dei kaba la ïoh mynsiem na ki jingshna tynrai jong ka thaiñ shatei lam mihngi.
Ha ka bynta kaba hakhmat la pynwandur bad pynitynnad lyngba ki jingdro bad jingthoh ka jylla Assam kaba la bud pat da ki jingthung bad ki mrad kiba don ha ka thaiñ. Kane ka scroll ka kynthup ruh ïa ka rukom thaiñ Thara ka Sikkim ryngkat bad ka Gogona, ka bynta kaba pyndonkam ha ka jingrakhe ïa ka Rongali Bihu.
Kiwei pat ki kynthup ïa ka Mithun Motif kaba la thaiñ na u Monk Shugu ka kot sada kaba la pynmih hi kaba mihkhmat ïa ka jylla Arunachal Pradesh. Ki siej bad ki jingdeng siej kiba la shna pyndait bha na ka jylla Tripura, ka jaiñ Khiamniungan jong ki kynthei na ka jaidbynriew Naga, ki soh bad ka Puan Chei ka jaiñkup tynrai ki kynthei Mizo kaba ki kup ha ki jingïalang kiba kyrpang. Ka Manipur kaba la pawnam ha ka Longpi Black Pottery, kala pynwandur da kaba shna na ka khyndew bad ki maw kiba ïong, ki dei ki bynta kiba kongsan bha.
Ki nongshah khot sngewbha kiba leit ban ïashim bynta ha Rashtrapati Bhavan ha ka 26 tarik u Kyllalyngkot kin shah pdiang sngewbha da ki jaiñ ryndia kaba pyni ïa ka jingriewspah ka jingpynmih ïa ki jaiñ tynrai naduh ki por hyndai ha ka thain shatei lamihngi. Ka jaiñ ryndia ïa kaba la tip ruh kum ka jaiñ jong ka jingsuk ne “Peace Silk” ka dei shi bynta jongka ïoh ka kot bad ka kolshor tynrai. Kane ka jaiñ kaba deng ka dei kaba la thaiñ da ki kti.