New Delhi, Jylliew, 18: Sa kawei ka kyrteng kaba thymmai ka la mih paw ha ka jingtohkit halor ka jingshah pynïap jong u nongkhaii heh spah na Indore, u Raja Raghuvanshi, 29 snem ka rta katba u dang leit kai honeymoon bad la ka kurim, jong u ka Sonam Raghuvanshi, sha Sohra, Meghalaya.
U briew uba la paw kyrteng mynta u dei sa u Sanjay Verma, ïa uba la ithuh kum u briew uba la ïakren ha mobile phone bad ka kurim u Raja, ka Sonam Raghuvanshi, kata hashwa bad hadien ba ladep ïathoh shongkurim.
Katkum ki Call Data Records ba la ïoh da ki Pulit hapdeng ka 1 tarik, Lber, bad 25 tarik Lber, ka Sonam bad u Sanjay ki la ïa phone haduh 119 sien. U mobile number jong u Sanjay Verma mynta um treikam shuh namarba la pynlip ïa ka phone.
Ha ka 23 tarik, Jymmang, u Raja u la shah pynïap ha View Point mot Arliang hajan Parking Lot Wei Sawdong, Sohra, East Khasi Hills, bad hadien ba la pynïap la bret ïa ka met jong u sha ka riat hajan ka kshaid Wei Sawdong. Ïa ka met jong u, la lap ha ka 2 tarik Jylliew, kata hadien 10 sngi ba u la jah rngai.
Ha ka 11 tarik, Jymmang, u Raja bad ka Sonam ki la ïathoh shongkurim ha Indore. Ha ka 21 tarik Jymmang, ki shikurim ki la poi ha nongbah Shillong, bad sah miet ha Balaji Guest House. Ha ka 22 tarik, Jymmang ki la shim wai da ka Scooty na Keating Road, Shillong bad leit shang suwari sha Sohra. Ha ka 23 tarik, Jymmang, ki Guide ki la ïohi ba ki shikurim ki la leit sha ka shnong Nongriat bad dei ha kane ka sngi ba la ïohi khatduh ïa u Raja uba dang kiew ïa ki mawkyndon ha Nongriat ha ka por mynstep ba ki la mih na Shipara Home Stay ha ka por kumba 5:30 baje haduh 6:00 baje mynstep.
Ha ka 24 tarik Jymmang la lap ïa ka Scooty ba la iehnoh ha Sohrarim. Ha ka 2 tarik Jylliew la lap ïa ka met ba la lam pyut ong u Raja ha riat mot arliang hajan ka kshaid Wei Sawdong.
Ka Sonam kaba la phetrieh hadien ka jingpynïap ïa u tnga, ka la leit aiti ïalade ha ki Pulit ka Uttar Pradesh ha Ghazipur ha ka 10 tarik, Jylliew.
