Paw kyrteng ka Alisha Lyngdoh ha ka kynhun India ban ïakhun ha ka SAFF U-19 Women’s C’ship
Shillong, Kyllalyngkot 30: Ka Alisha Lyngdoh, thei ïalehkai phutbol jong ka jylla Meghalaya, ka la shah kynthup ha ka kynhun India kaba don 23 ngut ki nongïalehkai ki ban leit ïakhun ïa ka SAFF U-19 Women’s Championship 2026 ha Nepal.
Ka kynhun ïalehkai jong ka ri ka la mih ban leit sha Nepal ha kaba kane ka lympung kan sdang naduh kane ka sngi Saitjaiñ, 31 tarik u Kyllalyngkot haduh 07 tarik u Rymphang.
Ka India kan ïashim bynta ha kane ka lympung da ka kynhun ïalehkai U-17, kaba dang pynkhreh na ka bynta ka AFC U-17 Women’s Asian Cup 2026 ban long ha China. Lah ban kdew ruh ba ka Alisha ka dei shi bynta na ka kynhun jong ka India kaba la rah ïa ka nam lahduh jong ka SAFF U-17 Women’s ha u bnai Nailar jong u snem ba la dep.
Ka la don ruh ha ka kynhun ïalehkai kaba ïakhun ha ka lympung ïaknieh rung lane ka Qualifier sha ka AFC U-17 Women’s Asian Cup ha u bnai Risaw. Dei nangne ba ka India ka la ïoh rung sha ka U-17 Women’s Asian Cup.
Shuwa ban jam sha kane ka lympung, ki thei ïalehkai U17 jong ka ri ki la pynlong ïa ka jingkilanmet ha Anantapur, Andhra Pradesh, bad ki la mih ban leit sha Nepal ha ka sngi Palei. Ïa kane ka SAFF Championship kaba don saw tylli ki kynhun yn ïalehkai ha ka rukom ïakhun round-robin, bad bud sa ka jingïakhun phainal hapdeng ki ar tylli ki kynhun kiba wan hakhlieh duh ha ka 07 tarik u Rymphang.
Kane kan dei ruh ka jingtynjuh (test) kaba nyngkong ïa ka coach ba thymmai jong ka kynhun phutbol U-17, ka Pamela Conti. La thung ïa ka ban shimti ïa kane ka kam ha kaba sdang jong une u bnai, ryngkat bad u hynmen jong ka, u Vincenzo Conti, u ban long uwei na ki arngut ki assistant coach.
Ka India kan aireng nyngkong ïa ka Nepal ha kane ka sngi Saitjaiñ (31 tarik Kyllalyngkot ha ka por 2:45 baje nohphai sngi), nangta pyrshah ïa ka Bangladesh (02 tarik Rymphang ha ka por 11:45 baje mynstep) bad ïa ka Bhutan (04 tarik Rymphang ha ka por 11:45 baje mynstep). Baroh ki jingïalehkai yn pynlong ha Pokhara Stadium bad yn pyni live lyngba ka Sportzworkz YouTube Channel.
Ka thup kyrteng jong ka kynhun India ki long:
Goalkeepers: Munni, Shelna Maria Sajit, Surajmuni Kumari
Defenders: Akashi Naik, Alena Devi Sarangthem, Alisha Lyngdoh, Binita Horo, Divyani Linda, Elizabed Lakra, Joyshini Chanu Huidrom, Taniya Devi Tonambam
Midfielders: Abhista Basnett, Alva Devi Senjam, Anita Dungdung, Julan Nongmaithem, Pritika Barman, Redima Devi Chingkhamayum, Shveta Rani, Thandamoni Baskey
Forwards: Anushka Kumari, Anwita Raghuraman, Pearl Fernandes, Valaina Fernandes
Head coach: Pamela Conti
Assistant coach: Vincenzo Conti
Assistant coach: Nivetha Ramadoss
Goalkeeping coach: Chandi Das