Paw kyrteng biang ka Ribansi Jamu ha ka kynhun India na bynta ka AFC U-20 Women’s Asian Cup 2026 Qualifier

Shillong, Nailar 01: Ka nongap kol ka Jylla ka Ribansi Jamu ka la paw kyrteng biang ha ka thup jong ki 23 ngut ki thei ïalehkai Under-20 jong ka ri India ka ban ïakhun ha ka lympung ïaknieh rung (Qualifier) sha ka AFC U-20 Women’s Asian Cup 2026.
ïa kane la pynthikna hadien ba u Joakim Alexandersson u la pynbna ïa ka kynhun ha ka sngi Palei, ha kaba ki thei ïalehkai jong ka ri kin hap ban ïakhun ïa ka lympung ïa knieh rung ka ba la buh ban sdang naduh ka 06 tarik haduh 10 tarik Nailar ha Myanmar.
Kumban shu pynkynmaw, ka Ribansi Jamu ka la shah jied ruh ha ka kynhun kham mynshwa ha u bnai ba ladep ban leit sha Uzbekistan na bynta ar tylli ki jingïalehkai paralok. Hynrei kam shym la ïoh satia ban mih madan ha kitei ki jingïakhun.
Ha kane ka lympung ïaknieh rung, ka kynhun India ka la shah thup ha ka Group D bad kan ïakynduh pyrshah ïa ka Indonesia ha ka 06 tarik Nailar, ïa ka Turkmenistan ha ka 08 tarik Nailar bad khatduh ïa ka ri ba pynlong, ka Myanmar ha ka 10 tarik Nailar.
Katkum ki kyndon, ka lahduh jong kawei pa kawei ka Group bad lai tylli ki kynhun kyrdan ba ar kiba kham kynsai ha baroh phra tylli ki Group kin ïoh rung sha katei ka lympung (AFC U-20 Women’s Asian Cup 2026) ka ban long ha Thailand ha u ïaïong 2026.
Ka kynhun ki thei ïalehkai ka India U-20 na bynta ka AFC qualifier ki long:
Goalkeeper: Melody Chanu Keisham, Monalisha Devi Moirangthem, Ribansi Jamu
Defender: Alina Chingakham, Cindy Remruatpuii Colney, Juhi Singh, Nishima Kumari, Remi Thokchom, Sahena TH, Shubhangi Singh, Thoibisana Chanu Toijam, Viksit Bara
Midfielder: Anju Chanu Kayenpaibam, Arina Devi Nameirakpam, Bhumika Devi Khumukcham, Monisha Singha, Neha, Pooja
Forward: Babita Kumari, Deepika Pal, Khushbu Kashiram Saroj, Sibani Devi Nongmeikapam, Sulanjana Raul
Support staff: Joakim Alexandersson (head coach), Paromita Sit (assistant coach), Hameed KK (goalkeeping coach), Karan Mane (strength and conditioning coach)