Nongstoiñ, Jymmang 10: Ka jingminot bad ka jingtrei shitom jong ki samla ha ka pule puthi, ka long ka nuksa ba bha ïa kiwei pat la ka dei ïa kiba pule hapoh ka jylla ne shabar ruh kumjuh.
Kawei na kita ka dei ka samla Balarihun Lyngkhoi na ka shnong Nonglang West Khasi Hills, kaba dang don mynta ha ka jingpule bad pyntbit bad ka ban sa pyndep noh ïa ka kyrdan Mater of Social Work, na kawei na ki College kaba don ha Bengaluru kaba la tip kum ka Kristu Jatyantu College (Autonomous).
Katei ka samla ka dei kaba la paw bha ha kiba bun ki liang ha ka ba ïalam ïa ki para samla pule ha katei ka College. Katei ka College ka dei ruh kaba la ithuh da ka sorkar pdeng bad ka la ïoh ruh ïa ka kyrdan A+ na ka National Assessment Association Council.
Dang shen katei ka College ha ryngkat ka jingïatreilang bad ka Sambhav Foundation, ka la pynlong ïa ka programe ba kyrpang halor ka phang Holistic Welness for Development Professional. Ïa katei ka programe la pynïaid da ka Ms Balarihun Lyngkhoi, Ms Neethimol bad u samla Sebastian Paul.
Ki jingai jinghikai ba kongsan ha katei ka programe, ki long ban pynsngewthuh ha kaba ïadei bad ka jingkoit jingkhiah ka jingtreikam jong ki briew ha kaba ïadei bad ka roi ka par.
Nalorkata ha katei ka programe la ai ruh ïa ki jinghikai ba bniah kumno ban don ïa ki jingmut jingpyrkhat kuba koit ba khiah, namar lada ki jingmut jingpyrkhat ki long ki bym koit bym khiah, ka pynlong ïa ki briew ki bym lah ban ïaid beit ha ka long ïing long sem bad ka imlang sahlang.
Ha katei ka programe ki samla pule ki la ai jinghikai ha la ki jong ki jong ki phang ba la pynbeit lypa, ha kaba ka Ms Balarihun ka la ïoh ban ai jinghikai halor ka phang, “Ki jingeh kaba ki nongtrei ki mad kata naduh ki nongtrei ha ki kam sorkar, ki nongtrei kam la jong namar ka jingbym burom ïa ka por, ka jing phiah ïa ka por ha kaba trei ïa ki kam ïing bad kiwei pat ki kam”.
Nalor kata ka la ai jingmut ruh kumno kin leh ban lait na kitei ki jingeh. Ka samla Neethu bad u Sebastian Paul pat ka la pynshai halor ka jingmut kaba ïar jong ka holistic wellness.
Ha kaba ïadei bad ka jingpynlong ïa katei ka programe ban ai ïa ki jinghikai ba kyrpang, kitei ki lai ngut ki samla pule kiba la ïashim bynta ha kaba ai jinghikai ïa ki para samla ki la pynpaw ïa ka jingsngewnguh bad ai khublei kyrpang ïa ki nongtrei jopng ka Sambhav Foundation, kiba la pynlut ïa ka por jong ki ban ïatreilang na ka bynta ban pynlong ïa katei ka programe kaba jop bad kaba sei soh.
Ki la ai khublei ruh ïa u Dr.Jonas Richard u ba dei u Head of Department jong ka Social Worker, ka Dr.Winnie Joce kaba long ka Training Coordinator kiba la ai ka jingkyrshan ba radbah, ha ka ban wanrah ïa ka jinglong shitylli bad ka jinglong kawei ha baroh ki jaka treikam, kiba la ïarap ruh ban pynshai bad pynkhlai kumno ban kyntiew ïa ka jingshakri ïa ki para briew ha ka imlang sahlang
