Paw ka skul Holy Angels bad St Paul’s HSS ha ka eksamin SSLC bad HSSLC ha Ri-Bhoi hadien ba rung ha ka Top -10

Nongpoh, Jylliew 10: Ka skul Holy Angels Secondary School, Bhoirymbong lem bad ka St Paul’s Higher Secondary School Nongpoh kila long ki skul kiba paw ha Ri-Bhoi, hadien ba 2 ngut ki samla pule kila wan shakhmat ban rung ruh ha ka kyrdan Top 10 hadien ka jingpynbna ïaka result SSLC bad HSSLC mynta ka sngi da ka MBOSE.
Kum ban shu pynpaw ba haka eksamin SSLC ka samla Laniewkyrpang Nongrum kaba dei ka khun jong u Bah Victor Jyrwa bad ka kong Ibalabet Nongrum naka skul Holy Angels Secondary School, Bhoirymbong kala rung haka kyrdan kaba 8 hadien ba kala ioh haduh 559 marks bad ioh distinction ha baroh 6 tylli ki subject, katba haka eksamin HSSLC u Samla Silbester Shadap naka skul St. Paul’s Higher Secondary School, Nongpoh u la u la rung haka kyrdan kaba 9 hadien ba u la ioh ban khur 422 marks bad ioh distinction haki 4 tylli ki subject.
U nongthoh khubor u la ioh ruh ban ïakren bad kitei ki ar ngut ki samla pule kiba la pynpaw ka jingsngewkmen kaba khraw halor ka jingioh kheit ïa u soh ba thiang hadien ka jingtrei shitom jong ki ba kila pynlut ka por ban minot thop haki jingpule kaba long ruh ka jingsarong kaba khraw ïaka skul bad ka district baroh kawei, namar ka dei ka sien ba nyngkong ba kitei ki skul ki ioh ban rung haka top 10.
Na ka liang jong I samla Laniewkyrpang Nongrum I la pynpaw ruh ka jingsngewnguh kaba khraw ïa u Blei u ba la btin lynti ïa I, ïaki kmie ki kpa, ki nonghikai kiba la kyrshan bad ai mynsiem ïa I ban poi sha ka thong, watla im ioh ka por shibun ban khreh kot namar ka jingbunkam ha iing nalor ba I dei naka longiing kaba duk hynrei ka jingtrei shitom bad ka jingminot kam shym la pynsepei ïaka jingthrang ban poi sha ka thong ha kaba I la pynpaw ruh ba I kwah ban long Doctor.
Na ka liang u Samla Silbestar Shadap, u la pynpaw nyngkong ïa ka jingsngewnguh kaba khraw ïa u Blei Trai kynrad u ba la lam lynti ïa u ha ka jingpynkhreh jong u ïa ka eksam HSSLC bad ruh ïa ki nonghikai jong u kiba la lah ban pyntbit bad ai mynsiem ïa u ban poi sha ka thong, kaba la wanrah ka nam bad ka jingsarong ïaka skul ryngkat ka jingangnud ba un dang trei shitom bad minot shuh shuh haki jingpule ba kham shalor. Ki bor pynïaid skul jong kitei ki ar tylli ki skul ha Ri-Bhoi kila pynpaw ka jingsngewkmen kaba khraw ba kitei ki samla pule kila wanrah ka nam bad ka burom kaba long ruh ka jingsarong ïaki nonghikai kiba la trei shitom ban btin lynti bad hikai ïaki khynnah skul, bad ka jingtrei shitom jong ki kam shym long leh nohei, hynrei ki ummat jingkmen ki tuid namar ka dei ka sien kaba nyngkong ïa kitei ki 2 tylli ki skul ba ki khynnah kin rung haka top 10.
Lyngba ka jingpass bha ki khynnah, kitei ki 2 tylli ki skul mynta ka sngi kila pynlong ka jinglehkmen ha skul hadien ba kidei ki skul kiba la paw haka top 10 ha Ri-Bhoi baroh kawei, watla ki don shibun kiwei ki skul kiba la pass bha ki khynnah.