Nongpoh, K’Lyngkot 18 : Wat hapdeng ka jingkmen jong ki paidbah ba bun ba lang khamtam ki nongshong shnong ha shilynter u surok Nongpoh Umden, hadien ka jingïaid shaid shaid jong ka kam ban siang rong ha kaba shi bynta ka wat ba nyngkong la dep ruh ban siang rong, hynrei ki kam torti kila paw pyrthei hadien ba ki paidbah kila iohi da la ki jong ki khmat ïa ka rukom trei torti bad lah ruh ban khoh da ka kti ïa ka rong ba la dep siang ha surok.
Katto katne ki paidbah kila pynsaphriang ruh da ki video halor ka jingtorti ka rukom siang rong bad ïa ka rong bala dep siang lah ban shu khoh tang da ka kti bad kane ka jingsaphriang jong ki video kala mih ruh bun ka jingsngewkhia bad ka jingpynrem na kiba bun ki paidbah ïaka kompani kaba pyntrei ïa utei u surok.
Lah ruh ban kdew hangne ba dang ha kine ki khyndiat sngi na ka liang u MLA ka Nongpoh u la leit ban jurip da la ki jong ki khmat ryngkat ki ophisar ïa utei u surok bad pynpaw ruh ka jingsngewhun halor ka jingsted ka kam kumba la angnud na ka bynta ka jingbit jingbiang jong ki paidbah, hynrei phewse ki paidbah ki dap da ka jingsngewsih kaba khraw ban ïohi ba utei u surok uba ki khmih lynti ba un neh hynrei ki dak ki shin ki la paw lypa tang mar ïa sdang ban siang rong ïa utei u surok ïa ki kam torti bad buh ruh u dak jingkylli ba heh ba katno utei u surok un neh lada ka rukom siang ka long ha katei ka rukom.
