Shillong, Nailar 01 : Ka nongïalehkai rah nar (weighlifting), ka Bindyarani Devi ka la ïoh takma rupa ha ka women’s 55 kg ha ka Commonwealth Games. Ka la lah ban rah ïa ka jingkhia kaba 202kg (86kg+116kg). Ym duna ïa ka shiphew snem ba la leit ba ka Bindyarani Devi jong ka jylla Manipur ka la sdang ïa ka Weighlifting ha u snem ha shnong jong ka ha Imphal.
Tang 3 snem ba ka la sdang ïa kane ka jingïalehkai ka la shah jied ban shah hikai ha Sports Authority of India’s (SAI) National Centre of Excellence (NCoE) ha Imphal bad naduh kane ka por kam shym la phaidien shuh. Hadien 3 snem jong ka jingshah hikai bad ka jingtrei shitom ha NCOE Imphal, ka la shah jied na ka bynta ka Indian National Camp ha Patiala Regional Centre jong ka SAI ha u snem 2019.
Ha kine ki snem ka la jop bun ki jingïakhun shabar ri kynthup ka takma ksiar ha ka Commonwealth Senior Championship 2019, ka takma rupa ha kajuh ka jingïakhun ha u snem 2021, hynrei ka jingjop ba heh tam jong ka ha ka rynsan ïalehkai shabar ri kadei ha ka miet jong ka 30 tarik Naitung haba ka la jop ïa ka takma rupa ha ka jingïakhun kaba 55 kg jong ka Commonwealth Games ha Birmingham.
