Nongstoiñ, Jylliew 10: Ka resol jong ka Meghalaya Board of School Education jong ki class X bad XII kaba la pynmih mynta ka sngi ka la pynkmen ïa baroh ki nonghikai, ki khynah skul kiba la pass bha bad ki kmie ki kpa, namar ki la ïoh ban kheit ïa u soh jong ka jingtrei shitom jong ki baroh shi snem.
Haba phai ha ki skul ha West Khasi Hills, dei tang ki khynnah kiba pule ha Anderson Secondary & Higher Secondary School kiba la ïoh ban rung ha ka thup kyrteng jong ki Top 20. Kitei ki arngut ki khynah class X kiba la ïoh rung ha ka Top 20, ki dei u Adamewanpynshngaiñ Syiem u ba la poi ha ka 16th position da kaba u la ïoh haduh 557 marks bad ïoh distinction ïa baroh ki subject.
Nangta kawei pat ka dei ka Ibalawanbiang Paliar kaba la ïoh distinction ïa baroh ki subject bad ka total marks ka long 554. Nalorkata uwei pat u khynnah u Namebankhraw Lyngkhoi wat la um shym la ïoh rung ha ka thup top 20 hynrei ïa ka subject Mathematics pat u la ïoh 100/100.
Ha kaba ïadei bad ka resol bad ka jingpass bha jong ki khynnah, ka kong S.Sangleiñ Vice Principal ka la pynpaw ïa ka jingsngewkmen kaba khraw ïa ka jingtrei shitom jong ki khynnah ban khreh kot, wat la ka la don ka jingktah na ka jingkhang dam ha kaba ym shym la lah shuh ban pynlong thikna ïa ki skul, hynrei na ka bynta ki khynnah baroh ki nonghikai ki la trei shitom da kaba pynlong ïa ki online class.
Ha kajuh ka por ka kong Sangleiñ ka la ai khublei ruh ïa ki para nonghikai, ki Nongkitkam ka Managing Committee, ka Sponsoring body, ki kmie ki kpa bad ka la phah ruh ïa ka jingkyrkhu kyrdoh sha baroh ki khynnah skul kiba la pass bha ha kane ka Exam kaba mynta bad kumjuh ruh sha ki khynnah skul kiba la dep pass ha ki snem ba la dep.
