Shillong, Rymphang 14 : Ka Directorate of Employment & Craftsmen Training kaba hap ha ka Department of Labour, Employment & Skill Development ka la pynbna ïa ka kyrteng ki nongjop ha ka jingïakob pynmih sap ba la tip kum ka North East Regional Skill Competition 2026, ha kaba ka Meghalaya ka la dei ka jylla kaba paw bad lehbha ha kane ka lympung ïakob kaba heh jong ka thain shatei lam-mihngi jong ka Ri.
Baroh ki la don haduh 22 ngut ki samla pule na ka jylla kiba shim bynta ha katei ka jingïakob kaba long haduh san sngi ha nongbah Guwahati naduh ka 18 tarik tad haduh ka 22 Kyllalyngkot mynta u snem. Kane ka kynhun ka la aireng bad ïakhun ha ki 12 tylli ki jait jingïalehkai.
Kane ka jingïakob ka ynthup naduh ha ka liang ka thup – Automobile Technology, Electrical Installations, Cooking, Beauty Therapy, Fashion Technology, Digital Interactive Media, Graphic Design Technology, Carpentry, Floristry, Cloud Computing, Restaurant Service bad Bakery.
Lyngba ka kyrwoh, la ong ba ki don bun bha ki samla pule na ka jylla kiba la khur ïa ka nam lahduh ha katei ka lympung ïakob.
Napdeng kine, u Dashemphang Thongni u la khur ïa ka takma ksiar ha ka Carpentry, u Hamebansan Lawriniang u khur takma ksiar ha ka Digital Interactive Media. Katba ïa ka takma rupa la khur da u John Maring ha ka Automobile Technology bad Deicy Swer ha ka Graphic Design Technology. Katba u Kyrshan Paliar u la khur ïa ka takma rnong ha ka Graphic Design Technology.
Nalor ki nongjop ha kaba khur takma, ki don ruh bun ngut ki nongshim bynta kiba la ïoh ruh da ka Medallion of Excellence bad kiba ïoh ïa kane ki kynthup ïa ka Anisha Ch Marak ha ka thup Cooking, Larisuk Sohtun (Restaurant Service), Ilarisha Matlang (Restaurant Service), Malvareen Umsong (Bakery), bad Fredickson K. Mawrie (Electrical Installations).
Na ka liang ki bor pynïaid ki la pyntip ruh ba kane ka jingjop jong ka Meghalaya ka pyni ïa ka jingnang kiew ka jylla ha ka jingdon ki samla kiba donsap.
