Patar ki briew na Assam ïa ka jainphong ka Longkmie na ka jingïakynad ba thung Post Iletkrik ka Assam

Nongpoh, Nailar 18: Kawei ka Longkmie na ka Shnong Maikhuli ka la jot ka sopting phong, kaba dei hadien ba ka la shah pajut ha ki briew na Assam, kaba dei halor ka jingïakynad na ka jingweng ïa u Post Ilektrik ba la wan thung da ka Assam ha u pud u sam ka Shnong Maikhuli.
Kane ka jingïakynad bad ka jingïakurup hapdeng ki briew na Assam bad na Maikhuli, ka la mih tang hadien katto katne kynta ba ki Nongshong ka Maikhuli ki la pynkyllem ïa u Post Ilektrik ba la wan sieh da ka Assam State Electricity Board sha u pud ka shnong Maikhuli bad ki briew na Assam ki la wan wad daw haduh ba la poi sha u pud ka jingïapynibor ka jingïakup hapdeng ki briew na Maikhuli bad na Assam.
Kumba la sakhi, ha kane ka jingjia ka la mih ka jingïakynad kaba jur, haduh ba la ïa rah kti ba ki briew na Assam ki la pynibor ïa ki nongshong shnong ka Maikhuli, kaba dei ka shnong kaba pyrshah ïa ka jingwan thung post ilektrik ka Assam sha u pud u sam jong kane ka Shnong ba hap ha ka jylla Meghalaya.
Halor kane ka jingïakynad kaba jur, ki Pulit bad Magistrate na Ri Bhoi District bad na Kamurp ki la wan poi mardor sha katei ka jaka ban pynthynda ïa kane ka jingïakajia, kaba la ktah ïa ka shongsuk shongsain ha kitei ki shnong khappud bad baroh kine ki jingjia ki la jia ka dei tang hadien ba ka State Electricity Board ka Assam ka la wan ban sih ïa 2 tylli ki Post ilektrik sha ka jaka ba la hap ha ka snong Maikhuli hajan ka pung Dohkha ha katei ka shnong.
Halor kane ka jingïakynad bad ka jingpynibor, ki magistrate bad ki pulit ki la pynthynda ïa ki paidbah bad ki la shim ruh ïa ka rai ban thung noh da ka Peace Committee, na ka bynta ban wan rah ïa ka shongsuk shongsain ki paidbah nongshong shnong ha kitei ki shnong khappud ka Meghalaya bad ka Assam.