Pat rai ka Liang Pyrshah ban ïakhun neem ïa ka shuki CEM ha KHADC

Shillong, Nailur 25 : Ka Liang Pyrshah ha KHADC kan sa shong pyrkhat la kin iakhun neem ia ka shuki Chief Executive Member hadien ba katei ka shuki ka la shong thylli noh da ka jingresaiñ noh u Bah Shemborlang Rynjah na ka shuki CEM ha kane ka sngi Balang.
Ha ka jingïakren bad katto katne ki lad pathai khubor, u Nongïalam ka Liang Pyrshah ha ka Council, Bah Titos W Chyne u la ong, “Ïa kane ngin sa ïa peit ha kine ki sngi namar haduh mynta ngim pat tip lano kan don ka jingjied ïa u CEM ba thymmai. Kumta tad haduh ban da ïoh ka jingpynbna na u Lat haba ïadei bad ka tarik elekshon na ka liang jongngi , ngin sa shong pyrkhat kaei kaba ngi dei ban leh.”
Shwa kane, u Bah Titos u la ïathuh ba mar mar hadien ba u ïohi ha ki lad pathai khubor ba u CEM u la resain noh, kumta khlem buhteng u la phone ïa u Bah Shemborlang ban pyntikna la ka dei neem ka jingshisha.
“Ha ka jingïakren, la ïathuh ba im don hapdeng ka met ka bym koit bym khiah. Kumta nga ruh nga la ai ka jingkitbok ba in ïoh noh ïa ka met kaba koit ba khiah,” u la ong.
Une u Nongïalam ka Liang Pyrshah u la ïathuh ruh ba lada jia pat ba katei ka dei ka jingpynbeit hapoh ka party, um lah satia ban kren ne ong ei ei.
Lah ban kdew hangne ba u Bah Shemborlang Rynjah u la shimti ïa ka shuki CEM jong ka Council ha ka 28tarik Rymphang, 2025 hynrei u la resain noh pat na kane ka shuki ha ka 24tarik Nailur.
Kumban shu kdew hangne, ha ka elekshon MDC kaba dang shu dep shen, na Ri Bhoi ka VPP ka la jop lai ngut ki MDC ba kynthup ia u MDC ka Mawhati Bah Kynjohlang Rangtong, MDC ka Umsning Bah Banrikus Nongstang bad MDC ka Umroi Bah Isynei Hinge.
Katba ka NPP ka la jop arngut ba kynthup ïa ka Kong Rona Khymdeit na Nongpoh bad Bah Sosthenes Sohtun na Jirang.
Ha East Khasi Hills pat ka VPP ka la jop haduh 11 ngut bad kine ki kynthup ïa u MDC ka Sohryngkham Bah Bill C Wankhraw, Bah Seiborlang Warbah na Mawkynrew, Bah Kitbor Syiem na Nongkrem, Bah Shemborlang Rynjah na Lyngkyrdem-Laitkroh, Kong Aibandaplin L Nonglait na Mylliem, Bah Winston Tony Lyngdoh na Nongthymmai, Kong Deity Majaw na Laitumkhrah-Malki, Bah Strong P Kharjana na Mawkhar-Pynthorumkhrah, Bah Denzil R Chen na Jaïaw, Bah Eddieson Kharumnuid na Mawlai bad Bah Lancaster Marbaniang na Mawphlang-Diengiei.
Kiwei pat ki kynthup ïa ka Kong Grace Kharpuri jong ka NPP na Nongshken, Bah Barikupar Barikupar Synrem na ka UDP na Shella, Bah Alvin Khyriem Sawkmie na ka NPP na Mawsynram, Bah Titosstar Well Chyne na ka NPP na Sohra, Bah Ricky Shullai MDC shimet na Laban-Mawprem bad Bah Synshar Kupar R Thabah na ka UDP na Nongspung Sohiong.
Katba na West Khasi Hills ka VPP ka la jop tang uwei kata tang u Dr. Juristman Ïawphniaw na Nongstoin, katba u Bah Lurshai Kharbani u jop kum u kyrtong shimet na Rambrai Jyrngam tangba hadien u pynïasoh noh sha ka NPP, katba u Bah Srally Rashir u la jop na ka HSPDP na Mawshynrut.
Ha South West Khasi Hills, u Bah Pynkhrawboklin Kharjahrin jong ka VPP u la jop na Mawkyrwat bad u Bah Pius Marwein pat u la jop na ka UDP na Langrin constituency.
Ha Eastern West Khasi Hills District, u Bah Equator Nongrang u la jop na ka UDP na Mairang-Nongkhlaw katba u Bah Powel Sohkhlet u la jop na ka VPP na Pariong-Mawthadraishan constituency.