Shillong, Naiwieng 24 : U President jong ka United Democratic Party (UDP) Bah Metbah Lyngdoh ha ka sngi Nyngkong u la pyntip ba na ka liang ka party haduh mynta kam pat lah rai satia la kan sei kyrtong neem ha ka elekshon MDC ha Garo Hills Autonomous District Council (GHADC) kaba la khmih lynti ba kan sa long shen ha kine ki khyndiat bnai.
“Ngi la thaw da ka komiti kaba kyrpang hapoh ka jingïalam jong ki nongïalam na rilum Garo ban peit bniah ïa ka jinglong jingman bad la ka i long neem ïa ka party ba kan s ei kyrtong ha kaneka elekshon MDC kaban sa wan,” ong u President haba kren bad ki lad pathai khubor.
U la ïathuh ruh ba ïa mynta hi ka party kan ap shwa ïa ka jingtip kaba katei ka komiti kyrpang kan ai ha shwa ba kin shim ïa ka rai la kin sei kyrtong neem bad lada kin sei ruh katno ngut kin pynieng.
Haba jubab pat halor ka jingkylli, u President u la ïathuh ba watla ka party kam pat rai haba ïadei bad kane ka elekshon hynrei u la ong pat ba lada jïa ba ki mih ban ïakhun kin ïakhun hi marwei khlem da ïateh lok bad kino kino ki party kiba don ha ka Liang Synshar.
Kumba ka long haduh mynta hi ym pat don kano kano ka party ruh kaba la mih shakhmat ban pynbna ïa ki kyrtong na bynta kane ka elekshon watla ki don pat ki party kiba la ïaid shakhmat ban wad kyrtong.
