Pune, Jylliew 21 : Ki bahaiing ha sem kumjuh ki paralok ki la leit ban ai khublei khatduh ïa u Irfan Shaikh, uwei na ki nongtrei jong ka Air India uba la khlad lang ha ka jinghap bad bthei jong ka liengsuin Air India dang shen ha ka taiew ba la dep.
Ïa ka met ba sah jong u la leh burom khatduh ha Pimpri Chinchwad ha Maharashtra ha kane ka sngi Saitjain.
Ka longiing Shaikh ka la pdiang ïa ka met ba sah jong utei u samla ba dang 22 snem hadien ba la pyntikna lyngba ka test DNA ha ka sngi Thohdieng bad kumta mardor la wanrah noh sha Pune ha ka step sngi Saitjain.
Ïa kane ka jingleh burom khatduh la pynlong ha u lumjingtep ha Nehru Nagar ha ryngkat ka jingdonlang ki bahaiing ha sem, ki paramarjan, ki paralok bad kumjuh ki nongïalam na kylleng ki kynhun bad seng bapher bapher.
Na ka liang ka kmie jong u Irfan, ka dang don mynta ha ka jingkyndit bad ka jingbym lah satia ban pdiang ba u khun jong ka um don shuh ha ka pyrthei, la ïathuh ki bahaiing.
La ïathuh ruh ba katei ka jingjia ka la ktah kynsan kynsan ïa ka bad kam shym lah ruh wat tang ban ïam ha kato ka por.
Katkum ka jingïathuh da ki bahaiing la ong ba u Irfan u la leit ban trei kum u cabin crew dang ar snem mynta hadien ba u la dep ïa ka jingshah hikai.
U Irfan u la donlang ha katei ka liengsuin ban leit sha London, hynrei ka la hap bad bthei noh pat ha ka medical college tang katto katne por mar ïa kiew na kadliengsuiñ Sardar Vallabhbhai Patel International Airport, Ahmedabad ha ka12tarik mynta u bnai.
Ki la haduh 241 ngut ki nongleit jingleit ha katei ka liengsuin kiba la khlad ha katei ka jingjïa nalor ki 29 ngut kiwei pat kiba don ha madan.
