Nongpoh, Jylliew 15: Ki 9 ngut ki khynnah pule jong ka Patharkhmah Government Higher Secondary School ki bym shym la mih kyrteng haka result SSLC ba dang shu pynbna shen da ka MBOSE, kila ïoh noh ïaka result mynta ka sngi hadien ka jingtuklar jong ka KSU bad ki nongïalam shnong jong ka Patharkhmah.
Kum ban shu pynpaw ba kitei ki 9 ngut ki khynnah kiba khlem mih result haka SLLC ba dang shu pynbna shen da ka MBOSE ki kynthup ïa u samla Iconstar Wahlang, Mewas Wahlang, Porshalis Syngkli, Elvister Lapang, Bornali Samba, Sitalin Syngkli, Shaidalin Lyngdoh, Ibanity Makri, Ponora Namsaw kiba shim ruh ïaka subject tourism bala kynnoh ruh ba ka jingbym mih result jong ki ka dei naka daw ka jingbakla u nonghikai ban ai mark ha kaba ïadei bad ka Internal Marks.
Halor katei ka jingbym ïoh result ki samla naka liang ki nongïalam shnong jong ka Patharkhmah bad kumjuh ruh ki nongïalam ka KSU Western Ri Bhoi hadien ka jingujor jong kitei ki samla bad ki kmie kila leit ruh ban ïakynduh ïaki bor pyniaid skul ba ki dei ban shim ka jingkitkhlieh ban pynïoh result ïa kitei ki khynnah namar bala dei ka por rung klas.
Hynrei dei mynta ka sngi naka liang ka MBOSE kala lah ban pynbeit bad pynbna syndon ïaka result jong kitei ki 9 ngut bad baroh naki kila pass lut, naka liang KSU bad bor shnong kila ai khublei ruh ïakitei ki khynnah ba kin dang minot bad ban dang trei shitom haki jingpule jong ki ba kham shalor khnang ba kin poi sha ka thong kumba ki angnud haka jingim jong ki.
