Shillong, Jylliew 15: Lai ngut ki samla pule jongka All India. Services Pre-Examination Training Centre (AISPETC) ha Meghalaya Administrative Training Institute (MATI), Mawdiangdiang, Meghalaya, ki la pyndep ïa ka Prelim exam jong ka Union Public Service Commission (UPSC).
Kine ki 3 ngut ki samla ki kynthup ïa Nidakyrkhu Dkhar, Anmiel Azareel Syiem bad u Thomas Edison Sumer.
U uwei na kine ki 3 ngut uba sah Hostel ula ong ba ka jingleit klas man la ka sngi bad ka jingleh ïa ki Test ka la ïarap ha ka ban pyndep ïa ka eksam.
Ka MATI, ka ai jinghikai ne Coaching ïa palat 125 ngut ki samla pule ha kine ki 2 snem kiba la dep.
Ka don ruh ïa ka hostel kaba ki khynnah ki lah ban sah haduh 75 ngut bad kine ki samla pule kidei kiba wan na kylleng ki bynta jong ka jylla Meghalaya ban pynkhreh ïalade ha kaban ïakhun ïa ka eksam UPSC.
Ki nonghikai na kylleng ki jylla jong ka ri India ki wan ban ai jinghikai ïa ki samla pule la ka long online ne offline.
La pynlong ruh ïa ki Test man la ka por khnang ba kan ïarap ïa ki samla pule ba kin nang ban pynkhreh bha ïalade bad kane ka jaka ai jinghikai kan ïarap ruh ïa ki samla ha ka jingpynkhreh ban ïaleh ïa ka eksam kaba kongsan jong ka UPSC kaban long ha u bnai Nailur mynta u snem.
Ki la don haduh 10 lak ngut ki samla pule na kylleng ki jylla kiba la ïaleh ïa ka eksamin ha kaba tang 14,000 ngut ki samla pule kila lah ban pyndep bad ban ïoh ban ïaleh ïa ka eksam kaba kongsan.
Lah ban kdew ba kine ki samla kiba pass ha ka preliminary jong ka UPSC kin ïoh ban ïakhun ïa ka Main exam ban ïoh long kum ki ophisar ha ka kyrdan IAS, IPS bad IFS.
