Par ñiangkhriat ki paidbah ba shah pyniap ka Samla ha u runar wat ha ka por mynsngi

Nongpoh, Nailur 26: Kawei ka samla ka la shah pynïap ha la u jong u Baieid mynta ka sngi ha ka Shnong Pahamsyiem kaba dei hadien ba ki la don ka jingïadei kaba la 5 bnai ei ei mynta bad ïa kane la ïathuh da u heh Pulit ka Ri Bhoi bad ki paidbah ki sakhi ïa kane ka jingshah pynïap katei ka samla, kaba dei hadien ba la lap ïa ka met jong ka, kaba la shah pynïap ha utei u runar uba la phet noh hadien ba la dung bad ot ïa u ryngdang jongka ha katei ka jaka ha Pahamsyiem.
Kane ka jingjia ka la jia mynta ka sngi ha ka por 11 baje ei ei mynstep ha ka Shnong Pahamsyiem, ha kaba la kynnoh ba utei u runar uba don ka jingïadei bad katei ka samla u la nud ban pynïap ïa ka da kaba dung da ka tari bad ot na ryndang haduh ba katei ka samla ka la duh syndon ïa la ka jingim khlem pat dei por.
Haba la ioh ban ïa kren bad u heh Pulit ka Ri Bhoi, u Giri Prasad, u la ïathuh ba ki bor pulit ki la ioh jingtip ha ka por 11 baje ei ei mynstep ba la pyntip da ki nongïalam shnong halor katei ka jingjia bad na ka liang ki pulit ruh ki la hiar mardor sha katei ka jaka na ka bynta ban pynlong ïa ka jingtohkit, hynrei hadien ba la poi ha katei ka jaka la lap ba katei ka samla ka la thiah ïap ha madan na ka jingdung ïap utei u briew ba la kynnoh ba ki don ka jingïadei kaba la don mynta la kumba 5 bnai ei ei.
Halor kane ka jingjia da ka jingshim khia ki bor pulit bad ruh da ka jingïatrei lang ki bor shnong tang hadien katto katne por ki la ioh ban kem noh ïa utei u runar bad na ka liang ki pulit ki la register case pyrshah ïa une u runar halor ka jingkynnoh don kti ban pynïap ïa kane ka samla, ong utei u heh Pulit ka Ri Bhoi.
Shuh shuh, u la ïathuh ruh ba ka jingtohkit halor kane ka jingja ka dang ïaid shakhmat bad ïa mynta ki bor pulit kim pat lah ban ai ïa ka daw tynrai kaba utei u runar u la leit ban pynïap ïa katei ka samla kaba u la don ka jingïadei la kumba 5 bnai. Ki bor pulit ka Ri Bhoi ki la pynthikna ruh ba utei u runar un ngat beit katkum ki kyndon jong ka ain bad na ak liang ki bor pulit ruh kin shim khia ïa kane ka kam khnang ba kum kine ki kam thombor pyrshah ïa ki kytnhei khynnah kan nym jia shuh kumba kane ka Samla ka la duh ei ïa la ka jingim, u la bynrap.