Shillong, Jymmang, 04: U President ka Khasi Jaiñtia National Union (KJNU) u Bah Niman Shadap ha ka sngi Palei u la panmap na u President ka Meghalaya Peoples’s United Front (MPUF) u Bah Dapoiwanmi Laloo halor ka jingjia ha u snem 2021 hadien ba ki dkhot ka KJNU ki la bat ïa ki trok ba la kynnoh ba ki kit ïa ki masi ba la thmu ban shalan be-aiñ.
Kane ka jingjia ka la poi haduh u pud ba ki nongïalam jong kine ki ar tylli ki sengbhalang kin ïa mudui ejahar mar kylliang bad u Bah Ninam Shadap u la shah set along haduh 14 sngi kynthih hadien ba um shym la lah ban sei ïa ki sakhi sabud halor ka jingkynnoh ba u President jong ka MPUF u Bah Dapoiwanmi Laloo u la pynap ïa u da ka pistol.
Hadien ba kine ki arliang mamla ki la poi noh sha ka jingïasuk, u Bah Niman Shadap u la ong ba um bat nud eiei ruh em ïa u Bah Dapoiwanmi Laloo halor ki jingjia kiba ladep.
Ha ka jingïakren bad ki lad pathai khubor ha nongbah Shillong, u Bah Niman u la ong, “nga pdiang ïa ki jingduna bad ki jingbakla jong nga bad nga la shah set byndi 14 sngi bad ïa kata ka pdiang bad nga da kyrpad rit ba nga kwah ban ïasuk noh bad u (Dapoiwanmi Laloo) khnang ba ki kam nangne shakhmat kin long kiba ïaid beit ïaid ryntih.”
Haba kylli, u la ong, ba ka seng nangne shakhmat ban trei beit kumba ju long ban ym ailad ïa kino kino ki kam kiba long be-aiñ hakhmat ka imlang ka sahlang da kaba ïatreilang bad ki bor jong ka aiñ.
