Panmap u Bah Prestone ba mad jynjar ki paidbah na jingtwa u lumbah ha surok Shillong-Dawki

Shillong, Nailur 28 : U Symbud Myntri Rangbah ka Jylla ba peit ïa ka tnad PWD, Bah Prestone Tynsong ha ka sngi Saitjaiñ u la leit ban jurip ïa ka jaka ba twa u lumbah ha lynti Shillong Pynursla kaba don haneng ka shnong Pomlum kaba la poi haduh u pud ba la hap ban khang ïa ka jingïaid ki kali na ka bynta arsngi ban ïoh pynkhuid ïa ka khyndew bad ki maw kiba twa na utei u lum.
Haba kren bad ki lad pathai khubor hadien ka jingjurip ïa kane ka jaka ryngkat bad ki heh ka NHIDCL bad ka kompeni ba pyntrei ïa kane ka surok, u Symbud Myntri Rangbah u la ong, Ka jingwan jurip jongnga ka long da ka sngewkhia namar kane ka dei ka jingtwa kaba nyngkong ba kan jur haduh katne katne. Nga nang pyrkhat ba ïoh ka dei ba ki sdang tih najrong hynrei kam don ei ei ei kum kata, kadei ba u hap hi u lum nangtei na jrong khlem don jingpynwit lane ka jingpynbthei ei ei hynrei ka hap la ka hap mynta la arsngi.
Shuh shuh u ong ruh ba kane ka jinghap watla ka dang bteng hynrei ki kyrmen skhem ba namar u slap u la duna la kumno kumno ki kyrmen skhem ba kan ym don shuh pat ka jingpynwit ïa ka ïaid ka ieng jong ki kali.
Tang kawei na ka liang ka sorkar bad ruh na ka NHIDCL bad kompeni kaba ngi kyrpad ka long ba ki paidbah kiba kiew ba hiar na kane ka jaka ba kin long kiba husiar katba lah bad ban kiar katba lah ban ïaid ha ka por mynmiet. Mynsngi mynshai ka kham shngaiñ hynrei te mynmiet myniong te ïaleh katba lah ban kiar na kaba kiew lane hiar.
Haba jubab ïa ka jingkylli, u Symbud Myntri Rangbah uba dei ruh ha kajuh ka por u MLA ka thain u la ong ba haduh mynta kim pat nud satia ban ong ba ka la don ka jingshngain khamtam mynta lei lei ba ka jingtrei ban pom ban mait ïa ka lynti thymmai ka la sdang.
Shwa kane, u Symbud Myntri Rangbah u la ïathuh ba namar kane ka jingtwa, ki paidbah na ka thain Riwar ki la hap ban ïaid kyllain naduh Sohra kaba ka jingjngai ka la long haduh lai shah.
Kadei ka jingshisha ba ka dei ka jingduhnong kaba khraw namar ki hap ban ïaid na Sohra bad ka bai kali ka long laishah ym dei shuh tang arshah ruh. Hynrei halor kane, nga panmap na ki paidbah jong ka thain ruh, ngin leh kumno namar kane ka kam ka long kaba donkam ban ong ban sangeh ruh ym long ban leh kumno kumno ruh ym long, ngim banse ban ïai shah shitom, u la ong.
Kumta, u la kyntu bad kyrpad ïa ki paidbah ka thain Riwar bad ka thain Pynursla baroh kawei ba kin ïai shah shitom bad ka sorkar namar u ong ba ki kwah ban pyndep kloi ïa kane ka kam bad lada lah ban pyndep ïa kane ka surok kan long da kawei pat ka pyrthei bad ka jingmyntoi kan dei ïa ki paidbah nongshong shnong ka thain hi baroh kawei.
Shuh shuh u la ong ruh ba ynda la dep kane ka surok ka jingwan jong ki nongwan jngohkai pyrthei kan long kaba jur bha ha ka thain Pynursla, ka thain Nongpdeng bad kumjuh ha ki thain Dawki.