Panmap ka kompeni TOPCEM ba kren pynshit ki nongtrei ha ka por pynlong ïa ka Public Hearing

Khliehriat nailar 26:Ki bor pynïaid jong ka kompeni Meghalaya Cement Limited (Topcem) ki la pan map ha kaba ïadei bad ka jingkren pynshit bad kren khor jong ki nongtrei jong ka ha ka por ba mih ka jingïakynad hapdeng ki paidbah bad ki bor pulit ha ka por ba thmu ban pynlong ïa ka public hearing ha ka 24 tarik mynta u bnai ha ka shnong Thangskai, East Jaiñtia Hills.
Katkum katei ka jingjia kaba la saphriang ruh lyngba ki social media la ïohi ïa ki arngut ki nongtrei jong katei ka kompeni kiba la pynshit ïa ki bor pulit ha ryngkat ka jingpynmih ïa ki kyntien kiba khor ban bom ban jied ïa ki paidbah kiba pynlong ka jingpyrshah ïa ka public hearing.
Na ka liang ki bor pynïaid jong kane ka kompeni ki la ong ba ki la shimkhia halor kane ka jingjia bad mardor ki la pynsangeh kam ne sospon noh ïa kine ki nongtrei kiba hap ha ka kyrdan Administrative Officer.
“Ngi pynthikna sha ki paidbah ba na ka liang ka kompeni Topcem ka kut jingmut na ka bynta ban pynneh pynsah ïa ka shongsuk shongshngaiñ hapdeng ki nongtrei bad ki paidbah nongshong shnong jong ka thaiñ ba marjan kiba don ka jingïadei bad kane ka kompeni jong ngi, bad ngi pynthikna ruh ba kum kine ki jingjia kin ym wan jia shuh hadien habud,” ong ki bor pynïaid ka kompeni.