Shillong, Naitung, 29: Ka Myntri ka tnad Rep ka Riang ka Sorkar Jylla ka Dr. Ampareen M. Lyngdoh, ka la khot ïakren ïa ki nongrep ha Secretariat ban sngewthuh ïa ki jingeh ba ki nongrep ki la ïa kynduh ha ka liang ka rep ka riang.
Ka Dr. Ampareen ka ïathuh ba bun ki nongrep kim pat ïoh jingtip kaba biang halor ki skhim jong ka Sorkar Pdeng. Ka la pynpaw ruh haba ka leit jngoh sha Jammu & Kashmir bad Nagaland ka ïohi ba la pynrung ïa ki soh kum u Apple bad u Phan ha ki skhim jong ka Sorkar Pdeng katba ha Meghalaya pat ki nongrep kim tip satia ïa kine ki jingai jingkyrshan.
Ka Myntri ka la panmap halor ka jingbym lah treikam lang jong ki Ophisar kiba dei ban pynpoi ïa ka jingtip sha ki nongrep. Ka la pynpaw ruh ba ka don ka jingbym sngewthuh jingmut hapdeng ka tnad Sorkar bad ki nongrep.
Ka Dr. Ampareen ka ong ba ka dei ka por ban ai jinghikai ïa ki nongrep halor ki rukom rep kiba biang. Ka kyrpad ïa ki nongrep ba kin ym rep tang da ki mar ba ki ju rep man la u snem, hynrei ban kyntiew ruh da kiwei pat ki jait jingrep.
Ka la kyntu ba dei ban pynlong ïa ki jingïalang paidbah ha man ki shnong lane ki block nongrep ban ïoh ban ai jingtip shai sha ki nongrep.
Ha kaba ïadei bad ka pisa, ka la ïathuh ba ka jylla Meghalaya ka dang duna ha ka jingïoh jingïarap pisa na ka Sorkar Pdeng. Hynrei ka la ong ruh ba la dep ïakren halor kane ha Iing Dorbar Thaw Aiñ hynrei haduh mynta ym pat don ka jingtreikam ne ka jingpyndep.
Ka la kyntu ruh ïa ki MLA ba kin long kiba peitngor bad tip bniah halor ki jingeh ki nongrep ha ki constituency jong ki bad ban ïarap ban pynpoi ïa ka jingtip sha ki paidbah nongrep.
