Shillong, Naitung 28: U Divension Lyngdoh, u samla ïalehkai kriket na South West Khasi Hills District ha ka 28 tarik Naitung, 2025 sngi Nyngkong, u la wan shakhmat ban pynshai bad pan map na ka Meghalaya Cricket Association [MCA], halor ka jingkynnoh ka jong u pyrshah ïa kane ka synjuk ba ka la leh politik ha kaba ïadei bad ka jingjied ïa ki rangïalehkai kiba nabar Jylla ha kaba bun ki nongïalehkai trai Jylla (khasi) ki la shah pynduh ïa ka lad ban mihkhmat ïa ka Jylla ha ki lympung jong ka samoi ïalehkai 2025-26.
Haba wan ban pynshai sha ki lad pathai khubor hynne ka lah sngi u Blei, une u samla, sa shisien u da pynpaw ïa ka jingsngew diaw ka mynsiem, hadien ba um shim la ïoh ïa ka kabu ksiar ban rung ha ka thup kynhun jong ka jylla ka ban khreh ïa ki lympung ïalehkai ban wan jong ka BCCI na ka bynta ka samoi ïalehkai 2025-26.
Na ka liang jong u Divension, u la ïathuh ba u sngew ba u la ïalehkai bha ha ka prokram pyrshang jied ïa ki nongïalehkai (selection trial) kaba la pynlong dang shen da ka MCA.
Hynrei kum u samla, uba ieit bad ba sngewtynnad bha ban ïalehkai ïa kane ka jingïalehkai kriket, u kyntu pat ïa ki bor ba dei khmih jong ka MCA, ba ka por ka la dei ïa ka ba kan ïaleh katba lah ban kham plie lad ne pynshlur ïa la ki jong ki khun samla ban mihkhmat ïa ka jylla, khnang ba kan long ka jingmyntoi ïa ki khun samla trai ri jong ka thaiñ.
Lah ban kdew ba u Devin Lyngdoh u la pynpaw ïa ka jingkynnoh ka jong u sha ki lad pathai khubor ha ka sngi thohdieng jong ka taïew ba la dep, khlem da ai kano kano ka sakhi lait noh tang ka jingkren jong u hi, ha kaba u la pynpaw ba ka don ka jingbamsap kaba jur hapoh ka MCA da kaba pynrung ïa ki rangïalehkai kiba nabar Jylla da kaba shim pisa T.5 lak ne 6 lak.
Ha kaba ïadei bad kane, na ka liang jong une u samla u la pan map ba ha ka jinglong briew ki don ki jingbakla ha ki kyntien kiba u la kum kren bad bynrap bad kyntu ruh ba ki bor ba dei khmih jong ka MCA ba ki dei ban kham ailad ïa ki samla trai ri (Khasi, Jaintia bad Garo) khnang ba kan long ka jingai mynsiem ïa ki nongïalehkai khamtam kiba na District ba kin trei shitom ban pynjanai ïalade ban ïoh mihkhmat ïa ka Jylla.
