Shillong, Ïaiong 28 : U Myntri ka tnad Bording ka Jylla u AT Mondal u la pan ka jingkyrshan na ka sorkar pdeng na kabynta ban don ïa ki projek pynmih bording kiba rit (hydro power plant) da kaba ong ba ki pump storage project (PSP) kim ïahap satia na bynta ka jylla Meghalaya.
Ïa kane u Myntri u la pynpaw haka jingïalang jong ka Regional Power Minister’s Conference kaba long ha Gangtok, Sikkim.
Haba ïadei pat bad ka phang ban ïoh ïa ka NOC na ka Meghalaya bandon ïa ka Pump Storage Projects (PSPs), u Myntri u la ong ba ïa kane ka ishu kumba la tyrwa da ka Ministry lyngba ka NTPC ban don ïa ki PSP kam ïahap satia na ka bynta ka jylla.
Kumta halor kane, u Myntri u la kyntu ïa u Myntri ka tnad Bording jong ka sorkar pdeng ba ka jylla kan kham ïohnong lada ka ïoh ïa ki hydro projek kiba pdeng. La ïathuh ruh ba ïa kum kine ki jingpynsngew, ka jylla ka ladep ban phah bunsien tangba kam pat don kano kano ka jubab.
U Myntri u la ïathuh ruh ba ka Ministry ka la kular ba kan shimkhia halor kane ka bynta ban ïarap ïa ka jylla bad kumjuh ïa ki CPSU da kaba kyntu ruh ïa ka jylla ba kan wad ki lad ki lynti wat ban don noh ïa ki Solar Plant kumjuh.
La ïathuh ba ka jingbanjur ïa ka Ministry ka long halor ka hydro power namar ka Meghalaya ka don kyrhai ïa ki lad ki lynti.
