Pan RTI ka HYC ba suki bad sahteng ka jaka sah ki nongtrei Civil Hospital Mawkyrwat

Mawkyrwat, ‘Naitung 30 : U Pynskhem Kharjahrin uba dei u President jong ka Hynñiewtrep Youth’s Council jong ka South West Khasi Hills District bad ha kajuh ka por kum u samla Nongïasaid Aiñ hapoh ka jylla, ha ka 29 tarik u ‘Naitung, 2025 u la leit buh da ka ehjahar ne RTI hakhmat u Public Information Officer (PIO) ba dei peit ïa ka jingshna ïa ki jaka sah ki nongtrei (Staff Quatres) jong ka tnat ka koit ka khiah Civil Hospital Mawkyrwat.
Ka daw jong ka jingleit buh jong u President jong ka Hynñiewtrep Youth’s Council jong ka South West Khasi Hills District ïa ka ehjahar ka long namar ka jingsuki bad jingsahteng ban pyndep ïa ki jaka sah ki nongtrei (Staff Quatres) ka tnat ka koit ka khiah ha Civil Hospital Mawkyrwat.
Haba kren ha ki lad pathai khubor, u Pynskhem Kharjahrin uba dei u President jong ka Hynñiewtrep Youth’s Council jong ka South West Khasi Hills District ula ong ba ka jingpyntrei ïa kine ki jaka sah ki nongtrei (Staff Quatres) jong ka Civil Hospital hapoh Mawkyrwat ka la ka lah kynjoh mynta lah palat 13 snem, hynrei watla katta ruh la ïohi ba haduh mynta ym pat shym ka lah ban pyndep.
Ym tang kata, u la long ruh ba ka jingsangeh noh jong ki nongpyntrei ne contractor ka dei ruh kawei na ki daw ba pynlong suki bad ban sahteng ïa ka jingpyntrei hynrei ym shym la tip pat balei ba ki hap ban sangeh noh shiteng por.
Hadien ba u Pynskhem Kharjahrin u lah dep ba buh ïa kane ka ehjahar ne RTI, u la ong ba ïa kiwei pat ki sienjam ban shim ha kaba ïa dei bad kane ka jingsahteng bad ka jingsuki jong ka jingtrei, na liang jong u ha ryngkat bad ka seng baroh kawei kin sa peit hadien ba ki lah dep ban ïoh ïa ka jubab napoh u Public Information Officer (PIO) ba dei peit.