Pan RTI ka FKJGP ba ïeng ka Mandir ha ka jaka ka District and Session Court, Khliehriat

Khliehriat, Naitung, 30: Ka Fedreration of Khasi and Garo Peoples, (FKJGP) East Jaiñtia Hills District Unit kaba la pyrshah ïa ka jingtei ïa ka Mandir ha jaka jong ka District and Session Court, ha East Jaiñtia Hills District ha ka Lah Sngi u Blei ka la pan da ka RTI na ophis u Deputy Commissioner ban ïoh ka jingtip kaba bniah halor kane ka jingïohlad ban tei ïa ka Mandir.
U President ka FKJGP East Jaiñtia Hills District, Bah Deihok Sumer u la ong, “ka seng ka pyrshah jur ïa kane bad ngin tih bniah ïa kane lyngba ka RTI bad hadien ba la ïoh ïa ka jubab RTI ka seng kan sa ai jingpynshai sha ki paidbah. Lada ka jubab RTI ka sngewïahap kam pher bad lada ïoh da ka jubab ka bym sngew ïahap ngin mih shakhmat ban pyrshah namarba katkum ka jingtip hi kane ka jaka ba shna ïa ka Mandir ka dei ka jaka Sorkar kaba dang hap ruh hapoh u pud u sam jong ka District and Session Court, Khliehriat bad kaba hap hapoh ka jingpeit ka Dorbar Shnong Khliehriat East.”
Katkum ka shithi RTI ba la soi kyrteng da u President FKJGP EJH u Bah Deihok Sumer bad u General Secretary u Bah Emlang Sutnga ka seng ka buh ki jingkylli, “hato ka Mandir/Temple kaba la sdang shna bad pynieng hapoh ka jaka ba don ka District and Session Court EJH ka dei ka jaka jong ka Mandir Puja Committee lane jong ki briew shimet ne jong ka Sorkar?”
“Hato ki riewshimet ne ki shnong ki thaw ne kino kino ki kynhun ki don mo ïa ka hok ban shna temple hapoh u pud u sam jong ka jaka ba dei jong ka Sorkar lada lah ban long kumta ngi pan ïa ki kot ki sla bad ki shithi jingpynbna (notification) bad ki shithi ai jingbit ne NOC jong kita kiba lah ban ai jingbit ban shna temple hapoh ka jaka sorkar,” la buh jingkylli ka seng.
“Hato ka Mandir Puja Committee ka la ïoh mo ïa ka syrnot NOC na ka Dorbar Shnong Khliehriat East bad na kiwei kiwei ki tnat ba dei peit ban shna ïa kane ka temple,” la bynrap ka jingkylli bad ong shuh shuh, “hato ka Mandir Temple Committee hato ka la wad ki lad ki lynti mo ban ïoh jingbit na ka tnat ba dei peit ne na ka sorkar jylla ban shna jaka mane blei ne Mandir/Temple ha jaka sorkar.”
Halor kitei ki jingkylli ba la buh, ka seng ka dawa ruh ba dei ban sei ryngkat bad ki kot ki sla ban pynshisha ban sakhi ba ban pynshisha da ki kot ki sla kum ki sakhi satar mano ba ai bor ban shna temple ha ka jaka sorkar.
Halor kane ka seng kan sa pynshai sha ki paidbah ynda la ïoh pdiang ïa ki jubab bad ong ba lada ym sngew ïahap ka seng kam mih madan.