Shillong, Nailar 28 : Ka Meghalaya Cement Limited (TOPCEM) ha ka sngi Nyngkong, ka la panmap na ki paidbah bad weng kam shipor ïa ki arngut ki Nongtrei kiba kren ïa ki ktien sih ha ka jingïakhih jong ki paidbah ban pyrshah ïa ka Public Hearing ba la pynlong na ka bynta ban pynheh ïa ka project jong ka kompani myn ha ka 24 tarik Nailar.
Ka kyrwoh ka ong “Ka bor pynïaid ka Meghalaya Cement Ltd (Topcem) ka pan map halor ki kyntien ba la pynmih da ki nongtrei ha ka jingïakhih ki paidbah ban pyrshah ïa ka public hearing ba long ha ka 24 tarik Nailar”.
“Katba ki Pulit ki dang pyrshang ban beh ïa ki nongïakhih kat kum ka jingbthah jong ki Heh Pulit, arngut na ki nongtrei jong ngi ki la pynmih ïa ki ktien sih ha katei ka por bad ïa kane ka jingjia la pynrem jur da ka kompani” kala ong.
“Ki bor pynïaid ka MCL ka la shimkhia bha halor kane ka jingjia bad ka la weng kam mardor ïa kine ki Nongtrei. Ka kompani ka pan map biang sa shisien ïa baroh ki paidbah trai shnong namar kane ka rukom pyni jinglong jong ki nongtrei jong ngi” kala bynrap.
Ka kyrwoh ka la ong ruh “Ngi kular ba ka MCL ka la kut jingmut ban ïaleh ha ka ban pynneh ïa ka jingsuk,jingsaiñ bad ka jingshngaiñ ïa la ki nongtrei bad ki nongshongshnong ba marjan kiba don jingïadei bad ka kompani jong ngi bad kular ruh ba kan ym jia shuh kum kine ki jingjia hadien habud”.
