Shillong, Naitung, 13: Ki kontraktor trai jylla kiba don hapoh ka shatri jong ka Public Health Engineering Contractors & Suppliers Association ha ka sngi Balang ki la leit ban pynsngew hakhmat jong u Myntri ka tnat PHE Marcuise Marak ban pan bujli da ka Phase-II na ka bynta ban pyntrei ïa ka skhim sam um kaba la tip kum ka New Shillong Water Supply Scheme (NWSS) kaba kot T. 1062 klur hadien ba ka tnat PHE ka la aiti ïa kane ka skhim sam um na ka Phase-I sha kawei ka kompeni kaba dei nabar jong ka jylla Meghalaya kaba kot T. 538 klur tam.
Ha ka jingïakren bad ki lad pathai khubor, u President Bah Robertson Lamare bad u nongaitktien jong ka Association u Bah Gilbert Laloo ki la pynpaw hakmat jong u Myntri ba kim don satia ka jingsngew halor ka jingaiti ïa ki jingtrei jong ka Phase-I sha ka kompeni kaba nabar jylla namarba ka dei ka kam kaba kham jwat bad kaba donkam ruh ïa ki Supervisor kiba biang, hynrei ki la pynsngew pat ba ïa ki jingtrei jong ka Phase-II ka Association ka kwah ban ïoh bynta lang namarba ki dei ki kam kiba ki Kontraktor trai jylla ruh ki lah da kaba suk ban trei.
