Shillong, Lber 25: Ka Ïingkashari Meghalaya High Court kala bthah ïa ka Sorkar Jylla ban ai ïa ka kaiphod ba don lang bad ki jingkheiñ jingdiah, halor ka jingdon jong ki thei ba armet, ki longkmie ba dang shu kha khun, kiba shah kyntait ha ki jaka sumar ban ïoh jingsumar ha ka por ba lynshop ka khlam Covid-19.
Kane ka hukum kala mih hynne ka sngi thohdieng na ka Ïingkashari Division Bench bala khlieh da u Chief Justice Sanjib Banerjee bad Justice W.Diengdoh haba bishar ïa ka PIL bala mudui da i Kong Agnes Kharshïing.
Kat kum kane ka hukum, ka Sorkar Jylla kala pynpaw ba kam long satia kaba shisha ban ong ba baroh ki Hospital ne jaka sumar ka Sorkar, namar ka jingpynkhreh ban ai jingsumar tang ïa ki nongpang Covid-19, kila kyntait ban pdiang bad ai jingsumar ïa ki kynthei ba armet lane ki kmie ba dang shu ïoh khun rit kiba donkam ïa ki jingsumar ba kyrkieh.
Ka Sorkar Jylla kala pynpaw ba ha ka jingwan lynshop nyngkong eh ka khlam, kaba long hapdeng ka taiew ba kut jong u Lber bad Naitung, 2020, ka dei ka jingsheptieng ïa kane ka khlam kaba pynlong ïa kiba bun ki briew ban salia ban mih nala ïing bad leit wad ïa ki jingsumar haba ki donkam.
Hynrei, ka Sorkar Jylla kam shym la lah pat ban ai ïa ki jingkheiñ halor kane ka jingkam jong ka lane ai jingkheiñ halor ka jingdon jong ki jingthiah ha ki Hospital na ka bynta ki longkmie ba leit kha khun hapdeng kane ka por.
“Ka Sorkar Jylla ka dei ban wanrah ïa ka kaiphod kaba bniah, kaba kyrshan lang da ki jingkheiñ jingdiah haba shong bishar biang ïa kane ka PIL ha ka 31 tarik Lber, 2022” ong ka hukum.
Ka Ïingkashari kala pynpaw ruh ba kan long ka jingmyntoi shibun ba ka Sorkar Jylla kan ai ïa ki jingkynja jingia rap sha kito ki longïing kiba duh noh ïa ki Kmie/Khun namar ka jingbym ïoh ïa ki lad jingsumar hapdeng kane ka por ba wan lynshop ka khlam. Kat kum ka kaiphod jong ka Sorkar bala phah sha ka National Human Rights Commission (NHRC) dang shen, la pyntip ba haduh 877 ngut ki Khunlung bad 61 ngut ki Kmie kila ïap ha Jylla Meghalaya ha ka por ba wan lynshop ka khlam Covid-19.
Ka Sorkar kala pyntip ruh ba ka daw jong kane ka jingïap ka dei namar kiba bun ki longkmie ba armet kila kyn tait ban leit shim ïa ka jingsumar jong ki jaka ai jingsumar namar ka jingsheptieng ïoh ki iabit ïa ka jingpang.
