Shillong, Jylliew 22 : Ka Iing Bishar Meghalaya High Court ha ka sngi Ba-ar ka la bthah ïa ka sorkar jylla ba kan phah ïa ka kaiphod halor ki sienjam ba ka la shim na ka bynta ban pyntreikam ïa ki kyndon ba la don lypa halor ka jingthew ïa ki kali kit mar kiba ïaid ha ka jylla.
“Ka sorkar jylla kadei ban phah ïa ka kaiphod hadien ba la rah biang ïa kane ka mat hadien lai bnai, ban kdew ba la shimkhia mardor ban pyntreikam ïa ki kyndon ba la don lypa haba ïadei bad ka jingthew ïa ki kali kit mar kiba la don ha ka jylla,” ong ka kynhun ki arngut ki nongbishar haba bishar ïa ka PIL ba la ujor da uwei u nongtrei sengbhalang, u Tennydard M Marak.
Utei u rangbah u la pynpaw ruh ïa ka jingsngewkhia halor pyntreikam ïa ki kyndon kiba ïadei bad katno ka jingkhia ba ki kali kin kit.
Katkum ka jingong jong u, ki don ruh ki kyndon ba pyntikan ba ki kali kit mar ba kin bud ïa ki kyndon katno ban kit hynrei kam don satia pat ka jingpyntreikam ïa kane ha ka jylla. La ong ruh da kaba buh hakhmat eh ïa ka jinglong kynjang bad long lum ka jaka nalor ka jingjur u slap ba ka jylla ka sakhi, kumta la ong ba donkam ban bud pyrkhing ïa ki kyndon ban kit ïa ki mar katkum ba la buh.
Ka Iing Bishar ka la ong ruh ba ka jylla ka lah ruh ban pyndonkam da ki khyrdop thew kiba la don lypa bad ruh ka lah ban pynieng da kiwei pat ha ki jaka ba kongsan khamtam eh ha kito ki jaka shwa ban rung sha ka jylla bad ruh ha ki jaka ha lynti.
La bthah ruh ba dei ban da buh ki bor pahara ban peit ba ki kali kit mar kiba pyndonkam da ka surok na kane ka jylla ba kin bud lang ïa ki kyndon ban kit katkum ka jingkhia ba la buh.
Ka jingbishar kaba bud kan long ha ka 21tarik u Nailur.
