Pan ka tnad pulit ïa ki kot ki sla na ka tnad PWD halor ka kynnoh bamsap 2366.77 klur ka surok Shillong-Nongstoin-Rongjeng-Tura

Shillong, Naiwieng 6 : Ka tnad pulit ka la phah shithi sha ka tnad PWD ha kaba la bthah ba kan ai ïa ki kot ki sla ba donkam ha kaba ïadei bad ka jingshna ïa ka surok Shillong-Nongstoin-Rongjeng -Tura ha ka jingmang pisa kaba 2366.77 klur tyngka.
Ka tnad pulit ka la leh ïa kane hadien ba la dep rejister case ïa ka FIR ba la ujor da ki heh sorkar ha kaba la jer kyrteng ïa ki kontraktor, ki engineers kiba ïadon kti ha katei ka bamsap ha ka jingpyntrei ïa katei ka surok.
“ Ngi la phah jingthoh sha ka tnad PWD ha kaba la bthah ba ki dei ban ai ïa ki kot ki sla ha kaba ïadei bad ka jingpyntrei ïa katei ka surok” ong u heh pulit.
U la ïathuh ka jingtohkit ka la ïaid shakhmat tangba ym pat kem ïano ïano ruh haduh mynta. 9 ngut ki briew kynthup ïa ki engineers ka PWD ki la paw kyrteng ha ka FIR kynthup ïa ki heh jongki ar tylli ki kompani kawei na Telangana bad kawei na Haryana.
ïa kane ka surok naduh Shillong shaduh Tura lyngba ka Nongstoin bad Rongjeng la ïoh lyngba ka Special Road Development Programme North East jongka sorkar pdeng ha u 2010. Ha kaba sdang ka jingmang ïa kane ka surok ka long tang 1303.83 klur tyngka hynrei namar ba la ïai pynthymmai ïa ka dor na ka por sha ka por kumta ka la kot sha ka 2366.77 klur tyngka. Ka por ba la buh ban pyndep ka long 2014 hynrei ym shym la lah ban pyndep ha ka por. Na ki heh ka PWD kiba paw kyrteng ki long naduh u Chief Engineer ba rim, u Executive Engineer barim bad kiwei kiwei. ïa ka FIR la ujor da u bah AM Kharmawphlang uba dei u Chief Engineer PWD (NH) uba la ïoh ïa ki jingtip ba bniah ha ka jingïakhun mukot duma Arbitral Tribunal.