Pan jubab ka KSBUH na ka Home Deptt. halor ka Tactical Team-I ba shah siat ïap u Bah Che

Shillong, Nohprah, 07: Ka Sur Ka Bri U Hynñiewtrep ha ka sngi Ba-ar ka la leit ban ïa kynduh bad u Secretary jong ka tnat kam poh ïing ka sorkar jylla u Bah CVD Diengdoh ban bud diren halor ka ejahar kaba ki la ujor pyrshah ïa ki pulit kiba la siat ïap ïa u Bah Cheristerfield Thangkhiew ha ka 13 Nailar 2021 bad kumjuh ban bud dien ïa ki sienjam kiba ka sorkar ka la shim ïa ki pulit kiba donkti ban siat ïap ïa u Bah Che kat kum ka jinglap ka Judical Enquiry kaba la thung da ka sorkar.
Haba kren sha ki lad pathai khubor hadien ba la dep ïakynduh bad u Bah CVD Diengdoh, u Bah Thomas Passah u nongïalam ka KSBUH u la ïathuh ba kat kum ka jingong une u ophisar ka sorkar kat haduh mynta kine ki pulit ka Tactital Team-I kiba hap ai jingpynshai sha ka tnat kim pat shym la ai jubab satia hynrei ki pan por pynban na ka sorkar,
“Na kaei kaba la jia ngi sngeewthuh biang biang ba kane ka jingleh ka sorkar ka dei beit tang ban pynslem khnang ïa ka jingïoh bishar bahok u Bah Che bad ban pyllait ïa ki pulit kiba siat ïap na ka jingshah pynshitom,” u la ong.
U la ong ruh ba na ka liang ka kynhun kan bteng ban buddien haduh ban da ïoh ïa ka hok jong u Bah Che.