Nongpoh, Naitung 30 : Ki nongïalam ka seng Ri-Bhoi Youth Federation, sengkmie mynta ka sngi kala leit ban ïakynduh syndon ïa u M Hog Chancellor ka skulbah USTM naka bynta ban pan jingshai ha kaba ïadei bad ka jingthoh kaba u la delete haka rynsan Facebook kum ka thong ka USTM bad ERDF ban ai jingpule ei ïaki khynnah kiba don sap bad kibym don ïing don sem, kiba shem lanot naka jingshah kyndang haka sorkar Assam.
Kumba long mynta ka sorkar Assam ka la kyndang naphang ïa kiba sah beaiñ ha katei ka jylla bad kum ka seng hadien ka jingiohi ïa katei ka jingthoh, la mih ruh bun tylli ki dak jingkylli ba kumno kitei ki khynnah ba shong beaiñ kin ioh ka hok ban pule puthi, katba bun naki samla haka jylla ki ba donkam kim ioh satia.
Ha katei ka jingleit kynduh jong ka seng bad u Chancellor, kala don ruh ka jingïa pynphai ñia kaba jur hapdeng ki nongïalam ka seng bad u chancellor bad u la pynshai ba kadei tang ka jingsngewthuh bakla jong ki paidbah ba bun ba lang.
Haba kren sha ki lad pathai khubor naka liang u Bah Phrangsngi Kylla Chief Organising Secretary ka seng haka jingdonlang u Bah Bawantippor Marweiñ Finance Secretary, Bah Liander Nongshli Working President bad kiwei kiwei u la ong ba kum ka seng ka sngewkhia halor ka jingthoh kaba u Chancellor ka USTM u la thoh haka rynsan facebook lyngba ka thong jong ka USTM bad ERDF ban ai jingpule ei ïakito ki khynnah bad kiba donsap kiba shah kyndang haka sorkar Assam.
U la ong ruh ba kum ka seng kan nym ailad lada ka jingthmu jong ka USTM bad ERDF ka long ban kdup ïa kitei ki poi wir ban ioh ka jingka riehtngen namar ka sorkar Assam kala dep ban kyndang ïaki, hynrei naka liang u Chancellor u la pynshai ka jingpdiang ïa kitei ki khynnah ki bym don ïing don sem ka dei ka thong jong ka USTM bad ERDF naduh ki por ba mynshuwa bad u la ong ruh ba kam dei ban pynrung ïaki ha skulbah USTM hynrei kadei ka skul naka bynta ki khynnah kaba don ha Karimganj Assam.
Kum ka seng ka maham bad kan leit ruh ban khynra ïaki jaka trei jong katei ka skulbah la ki nongtrei kidei kiba biang ne kiba shu wanrah da ki poiwir kiba khlem ki kot ki sla kiba biang.
