Shillong, Nailur 08: Ka Meghalaya SSA Schools Association (MSSASA) ka la pan ka jingpynshai na ka sorkar jylla ha kaba ïadei bad ka hukum kaba dang shen jong ka Supreme Court ban pynlong kongsan ïa baroh ki nonghikai kiba dang trei ba kin pyndep ïa ka Teachers’ Eligibility Test (TET) hapoh ki ar snem. Bad lada kim leh ïa kane ka kam, ka jingïoh jingshong thait jong ki bad kiwei ki jingmyntoi kin duh noh.
“Kum kiba don bynta ha ka kam hikai ngi kwah ban sngewthuh halor ka jingïeng jong ka sorkar ha kaba ïadei bad kane ka hukum jong ka Supreme Court bad kumno yn pyntreikam ha Meghalaya,” ong ka MSSASA ha ka shithi ba la phah sha u Commissioner & Secretary ba khmih ïa ka tnat Pule u Vijay Mantri ha ka sngi Nyngkong.
Na ka liang ka seng ka la pynpaw ruh ba ki jingpynshai bad ki jingïalam lynti jong ka sorkar ka long kaba donkam ban ïarap pynbeit lem ïa ki jingeh ba mad da ki nonghikai ha kylleng ka jylla. Ka la kyrpad ruh ïa ka sorkar ba kan pynmih da ka jingthoh ban pynthikna ïa ka jingdonkam ka jingïasyllok halor kane ka kam bad ban pyntip ruh sha ki nonghikai bad ban kyrshan lem ïa ki.
