Shillong, Nailur 23: Kum shi bynta ban pynpaw ïa ka jingpyrshah na ka liang ka Khun Hynñiewtrep National Awakening Movement (KHNAM) State Youth Wing, ha ka sngi Nyngkong, ka la leit pan jingshai na ki bor pynïaid ka Civil Hospital, Nongpoh halor ka jingkhlad i khyllung iba la kha da ka Kmie ha paiñkhana jong ka hospital.
Katkum ka kyrwoh khubor la ong ba kane ka seng saiñ pyrthei hapoh ka jingïalam u Working President Joseph H Pyngrope, ka la leit ïakynduh ïa ka Medical Superinrendent ka Hospital bad kumjuh ruh ïa ka Longkmie bad u Kurim kiba la duh noh ïa la i khyllung myn ha ka janmiet 21 tarik Nailur.
Ha kaba ïadei bad kane haba kren sha ki lad pathai khubor, u samla Joseph ula kynnoh ba ka Medical Superintendent kam shym la lah satia ban ai jingshai ha kane ka sngi bad ka la phah wan biang ha kiwei ki sngi hadien ba ki bor hospital ki la lum pyndep ïa ki jingtip baroh.
Une u nongïalam ka KHNAM ula pynrem jur halor ka jingkynnoh ba kane ka longkmie ka hap ban ap haduh 2 kynta shabar jong ka khyrdop ka hospital ban ïoh rung namar ba ym don briew ba ap ha kane ka khyrdop.
U la buh jingkylli la ka “First referral unit (FRU)” bad ka “Antenatal care” ka treikam ne em ha kane ka Hospital Sorkar bad lada ka treikam u la buh pat ïa ka jingkylli, balei ba katei ka longkmie kan hap ban ïeng haduh 2 kynta habar ka Gate Hospital ha ka por ba wan ban phah sumar.
