Shillong, Risaw, 14: Ka Hynñiewtrep Youths’ Council (HYC) ka la dawa ïa ka Sorkar ban pynsangeh shwa ïa ka jingthungkam na ka bynta ki 21 tylli ki post jong ka Medical and Health Officers (M&HO) da kaba pynpaw ba ka bhah thungkam sha ki lai tylli ki jaidbynriew ka jylla ka paw kumba ka pynkheiñ ïa ka bhah thungkam thungjam.
Ka kynhun jong ka HYC ba la lamkhmat da u President u Bah Roykupar Synrem ka la aiti ruh da ka jingthoh ha u Commissioner and Secretary uba khmih ïa ka tnat ka Koit ka Khiah u Dr. Joram Beda, da kaba kyrpad ïa u ban pynbeit ïa kine ki jingdkoh ha kaba ïadei bad jingthungkam kumba la pynbna ïa ka result da ka MMSRB ha ka 8 tarik mynta u bnai.
Na ki 21 tylli ki post M&HO, 4 tylli ki post la ai sha ki nongthep kam Khasi bad Jaiñtia kaba long (19%), katba 11 tylli ki post la ai sha ki nongthep kam Garo (53%), 2 tylli ki post ha ka Unreserved Category (9.5%), bad 4 tyllli ki post ha ka Other Scheduled Tribes/Other Scheduled Castes (OST/OSC) (19%).
Ka HYC ka la kdew ruh ba kane ka jingai bhah ka paw ba kam ïahap bad ka Meghalaya State Reservation Policy jong u snem 1971, kaba la mang ban ïasam 40% ïa ki Khasi bad Jaiñtia, 40% ïa ki Garo, bad 20% ïa kiwei pat.
Ka HYC ka la kyrpad ban ai ïa ka thup kaba bniah jong ki nongaplai na ka MMSRB na ka bynta ka post M&HO, ryngkat bad ki kot ki sla kiba kyrshan.
Ki la pan jingshai ruh hato la pyndonkam neem ïa kino kino ki kyndon ban rah shakhmat ne ban rah shadien ha ka jingpyntreikam bad ki la kyrpad ba dei ban pynsangeh noh ïa ka jingpynrung kam tad haduh ban da pynbeit ïa kane ka kam.
Ka HYC ka la pynpaw ruh ïa ka jingsngewkhia ba ka jingbym ïahap ka la pynmih ïa ka jingeh kaba khraw hapdeng ki nongthep kam Khasi bad Jaiñtia bad ka la kyntu ïa ka tnad ka Koit ka Khiah ban shim ïa ki lad ki lynti ban pynbeit bad ban pynthikna ïa ka jingbud ryntih ïa ka Reservation Policy bad ka jingleh hok ha ka rukom thung kam.
“Ngi la kyntu ïa ka Sorkar ba ka dei ban wanrah ïa ka rukom treikam ka ban pynsuk bad kumjuh ruh ban pynsngewthuh ïa ki briew manla ka por ba don ka jingpynrungkam ba katno tylli ki post ki nongthep kam Khasi-Jaiñtia bad Garo ki dei hok ban ïoh,” la ong u Bah Synrem.
“U (Beda) u la ai ïa ka jingpynshai bad u la pynthikna ruh ïa ngi namarba ngi la pyntip sha u ba ki don ki kyrtong bapher bapher na ka jaitbynriew Khasi-Jaiñtia kiba kloi ban shakri ha ki hospital Sorkar hynrei namar ka Roster, mynta la pyndap tang saw ngut ki Khasi-Jaiñtia watla ki don bun kiba la pyntbit (kumba 100-200 ngut na ki). Namar ba ka Roster ka shah tang saw ngut, ïa kiba sah ym shym la lah shuh ban pynrungkam. Kumta, ngi kwah ba baroh kito kiba kloi ban shakri ha ki hospital bapher bapher bad ki jaka pule bapher bapher ha ka jylla ki dei ban ailad ban shakri. Kiba bun ki dei kiba shakri kum ki nongtrei 3F jong ka Sorkar Jylla bad ki kwah ban shah pynskhem,” la ong u President ka HYC
“Ngi la kyrpad ruh ba ïa ka jingpynrung kam kaba hadien dei ban leh noh kloi katba lah bad u (Beda) u la pynthikna ïa ngi ba ka jingpynrung kam kaba hadien kan long kham bunsien ha u bnai Nohprah mynta u snem khnang ba ki nongthep kam kiba biang ki dei ban aplai bad yn pynrung ïa ki katkum ka kam ba la mang lane katkum ka roster ba la pynkhreh da ka tnad,” u la bynrap.
