Jowai, Nailar, 07: Ka Hynñiewtrep Integrated Territorial Organization (HITO) West Jaiñtia Hills District ryngkat bad ka HITO Jowai Circle ha ka sngi Balang ki la leit ïakynduh ïa u CEM ka JHADC ban pan jingshai halor ka MoU ba la ïasoi hapdeng ka Earth Tree bad ka JHADC, ha kaba na ka liang u CEM ka Council ula pynshai ba ka Council ym dei ba kan ai ïa ki jaka jong ki riew shimet lane ki private land owner, hynrei kane ka company ka lah ban ai tang ïa ki Government land kiba kynthup ïa ka District Council bad ki state forest.
U la ong ruh ba ïa kane ka company la ithuh da ka sorkar India kumta ula ong ruh katkum ka agreement bala dep ïasoi ruh ka long kaba biang hadien bala dep rai da ka EC jong ka Council, ula pynshai ruh ba kane ka scheme bala ai da ka Earth Tree ka long kum ka jingpyrshang (trial) hapoh ki snem ba ki ladep soi ïa ka agreement, hadien nangta pat lada ka long kaba tikna ka Council kan ai kylla pat ïa ka riew shimet hapoh ka jingpynïaid jong ka ïa kane ka scheme.
U Hame S. Rymbai uba dei ruh u General Secretary ka seng HITO West Jaiñtia ula pan copy ha ka jingïadei bad kane ka agreement, kumta u CEM ruh ula monjur ban ai khnang ba ka seng kan tip bniah shaphang kane ka scheme bad u paidbah ruh un lait na ka jingshong syier ha ka jingïadei bad ka khyndew ka shyiap la jong.
