Shillong, Risaw, 28: Ka ïingbishar Meghalaya High Court ka la bthah ïa ka Sorkar Jylla ban phah ïa ka jingpynshai ha kaba ïadei bad ka jingpyndap ïa ki kam kiba lait da kaba kyntiew kyrdan ha ka tnat Fishery Department, shwa ka 12 tarik Kyllalyngkot, 2023, hapoh lai taiew.
Ka division Bench kaba kynthup ïa u Chief Justice Soumen Sen bad u Justice W. Diengdoh ka la shong bishar ïa ka ujor ba la mudui da ka Meghalaya Fishery Field Staff Service Association.
Ka ïingbishar ka la kdew ruh ïa ki rule ba ladep kaba mang kyrpang 35% ki posts jong ki Fishery Officers na ka bynta ban kyntiew kyrdan napdeng ki dkhot jong ka Meghalaya Fishery Subordinate Service, hynrei katkum ka kyndon la pynhiar sha ka 25%. Ka ïingbishar ka la pan jingpynshai ba ha kano ka rukom ïa kiba sah sa 10% yn pyndap.
“Ngi donkam ïa ka jingpynshai na ka Jylla halor ka jingpyndap ïa ki kam ba lait da kaba kyntiew kyrdan shwa ka 12.01.2023 namarba ka paw na ka jingpynbna kaba mynshwa ba 35 percent la mang kyrpang na ka bynta ka post jong ki Fishery Officer da kaba kyntiew kyrdan napdeng ki dkhot jong ka Meghalaya Fishery Subordinate Service kiba bat ïa ka kyrdan Fishery Supervisors. Hynrei, da ka kyndon ba la pyndait ha ka kyndon (iii) la ong ba ka jingdon jong ki briew baroh kiba la thungkam da ka rukom pynkiew kyrdan napdeng ki dkhot jong ka Meghalaya Fishery Subordinate Service kim dei, ha kano kano ka por, ban palat ïa ka 25 percent jong ka jingdon baroh ha ka kyrdan III jong ka jingshakri. Ym don dak ei ei kumno yn pyndap ïa ka 10 percent kaba dang sah katkum ki kyndon ba mynshuwa”, la ong ka Bench ha ka hukum jong ka kaba la pynmih ha ka sngi Baar.
“Ïa ka Affidavit jingpynshai haduh kata ka por dei ban phah hapoh lai taiew naduh ka tarik ba la ai lypa sha u nongïasaid aiñ na ka bynta u nongmudui,” la bthah ka Ïingbishar. Ïa kane ka kam la buh sngi haduh ka 18 tarik, Naiwieng, 2025, ha kaba la bthah ïa ki arliang mamla ban aiti ïa ki jingkynthoh ha katei ka por.
