Pan jingpynshai u MLA ka UDP na u myntri ka tnad bording halor ka jingtreikam ka MSERC

Shillong, Rymphang 19 : U MLA ka UDP na ka West Shillong Constituency u bah Paul Lyngdoh mynta ka Sngi Palei u la pan jingpynshai na u Myntri ka tnad pynmih bording u bah Metbah Lyngdoh halor ki rukom treikam jongka Meghalaya State Electricity Regulatory Commission (MSERC) bad kaei ka kyrdan bad bor jongka.
U bah Paul u la pan jingpynshai haduh katno ka sorkar ka don ka bor ban khmih ïa ka Commission bad u Myntri u la jubab ba ka bor jongka sorkar ka dei tang ban thaw ïa ki polisi treikam. U la ong ba ka sorkar kan lah ban mushlia ïa ki rai jong ka Commission khamtam ha kaba ïadei bad ka dor bai bording.
U bah Paul u la banjur halor ka jingïalang kaba la long ha u snem ba la dep ha kaba la ïakren halor ka jingpynlip bording ba khah khah bad ka jingkiew ka bai bording bad kylli halor kane hato ka MSERC ka la leh ei ei ne em.
U bah Metbah u la ong ba ka Commission ka ju pynlong da ka jingbishar paidbah (Public Hearing ) halor kino kino ki jingeh bad phah ïa ki jingpynkylla lada don man la u snem.
U la ïathuh ruh ha kaba ïadei bad ka dor bai bor ding la pynshong nongrim beit kat kum ka jingrai jongka Commission bad ym don ba lah hi ruh ban pynkiew ïa ki bill katba ki mon.