Nongstoiñ, Nailur 08: Ka jingpynksan jong ka Ïingbishar ba don burom ka Meghalaya High Court ïa ka mokutduma, halor ka jingsuba ba ka Dr Ampareen Lyngdoh ka donkti ha kaba tah sia lieh ïa ka jingthung kam nonghikai, ka la pynkyndit ïa ki hynriew phew hynriew ngut ki nonghikai kiba ki kyrteng jong ki kim shym la shah tah sia lieh. Hynrei ka sorkar ka la shu shah weng jyndat ïa ki na ka kam kat haduh ba ki hap ban ïaleh da ka mokutduma.
U bah Dominik Lyngkhoi uwei na ki nonghikai u ba don lang ha ka thup kyrteng jong ki hynriew phew hynriew ngut ki nonghikai, u la ong ba hadien ba kitei ki hynriew phew hynriew ngut ki nonghikai ba shah weng kam, ki la ïohi lyngba ki lad pathai khubor halor ka jingpynksan jong ka Ïingbishar ba don burom ïa katei ka mokutduma sia lieh ki la lyngngoh ngaiñ.
Ha kajuh ka por u la ong ba na ka liang jong kitei ki nonghikai kiba shah weng kam, kim don kano kano ka jingsngew pyrshah ïa kaei ba ka Ïingbishar ka rai bad ki burom ïa katei ka rai. Hynrei ka kam jong ki mynta ka long ba ki kwah ba ka sorkar ka dei ban ia ka jingpynshai halor ka jingweng noh ïa ki na ka kam khnang ba kin hun ka mynsiem.
U babu Dominik u la ong ruh ba ka jingkwah jong ki ba ka sorkar kan ai ïa ka jingpynshai, ka dei halor ka nongrim ba ka la thung kam biang ïa ki shispah sawphew hynriew ngut ki nonghikai kiba ki kyrteng jong ki, ki la don lang ha ka thup jong kiba shah weng na ka kam.
Shuh shuh u la buh jingkylli ruh ïa ka sorkar ba hato ka jingthung kam biang tang ïa ki shispah sawphew hynriew ngut kam long ka jingleh shiliang khmat? Lada ka sorkar ka sngewthuh ba ka tarajur ka noh shiliang ka la dei ban ai kano kano ka jing pynshai la kan ai ne em ïa ka pernshon jong ki lane kumno kan leh.
U la bynrap ruh ba ki hynriew phew hynriew ngut ki nonghikai ki kwah ba lada kam thung kam shuh ïa ki ruh, ka dei ban thaw da kano kano ka lad ban pynim jakpoh, namar ka sorkar ka la weng kam ïa ki ha ka por ba ka karta kam long shuh ban aplai da kiwei pat ki jait kam sorkar.
U la ong ba lada trei da kiwei pat ki kam ruh kim nang shuh ban trei nalor ba ki la sdang sa ban noh ka met ka phad bad la kumno kumno ka sorkar ka la dei ban thaw da kiwei pat ki lad ban pynim ja ïa ki kumba ka leh ïa kiwei.
