Shillong, Nailar, 07: Ka Khasi Students Union (KSU) hapoh ka jingïalam jong u Assistant Education Secretary u Samla Richest Malngiang ha ka Lah Sngi u Blei ki la ïakynduh ïa u Vice Chancellor jong ka skulbah NEHU u Prof. Prabha Shankar Shukla ban pan jingpynshai ha kaba ïadei bad ka jingpyntreikam ïa ka Four Years Undergraduate Programme jong ka National Education Policy-2020.
Ha ka jingïakren, ka Seng ka la dawa ïa u khliehduh jong ka skulbah NEHU ba u dei ban ai ïa ka jingpynshai kaba kham janai khnang ban weng ïa ka jingsah umdum jong ki Kolej bad ki samla pule ki bym pat lah ban sdang ïa ki klas na ka daw ka kynrum kynram ba mih na ka National Education Policy (NEP).
Ka seng ruh ka la kren shai ba ka pyrshah ban pyntreikam ïa kane ka policy lyngba ka Hybrid Mode bad ha kajuh ka por ka seng ka la dawa ba lada dei ban pyntreikam ïa ka Four Years Undergraduate Programme (FYUP) ruh dei ban pyntreikam salonsar lane lada pyntreikam da ka System kaba rim ruh dei ban long salonsar.
U Vice Chancellor ha ka jingïakren u la ong ba shen ka University kan sa shong pyrkhat bad ka tnad Pule Puthi jong ka Sorkar Jylla ban ïakren janai halor kane ka NEP.
Ka seng ka la dawa, hadien kane ka jingïakynduh, ka jingpynshai ka dei ban mih ba lada yn pyntreikam ïa ka System ba thymmai ne kaba rim khnang ba ki samla pule kin ym shah ktah ha ka jingslem ban sdang ïa ki klas jong ki, bad lada jia ba kin ïaid shakhmat ïa ka system ba thymmai ka University ha ryngkat lang bad ka Sorkar Jylla ki dei ban ïarap bad kynpham lem ïa kito ki College ki bym kotbor ban pyntreikam ïa kane ka FYUP khnang ba ki samla pule ha kito ki College kin nym shah ktah.
Ka Seng ka la ïakren halor ka jingeh jong ki samla pule kiba dei na ka jaidbynriew Khasi kiba pule ha Manipur University hadien ka jingïakynnad bad jingïaumsnam, ki don mynta hapdeng ka khim khait ban leit phai ban ïoh bteng ïa ka jingpule. Halor kane, ka Seng ka la dawa ïa ka skulbah NEHU ba kan pdiang kyrpang ïa kine ki samla pule hapoh skulbah NEHU ban bteng ïa ka jingpule jong ki na ka Semester kaba ki dang pule mynta lane ban pynrung thymmai ïa ki naduh ba sdang.
U Vice Chancellor, ha ka jingïakren, u la mynjur ban peit bniah ïa kane bad kular ruh ban ïarap ïa kine ki samla pule bad kumjuh u la kyrpad ïa ka KSU ba kan phah kyrpang ïa ki kyrteng bad ka jingtip ba kham bniah khnang ba un ïoh ban ïakren bad ki Deans jong ka Board of School Studies, NEHU la yn pdiang ïa ki kum ki khynnah pule thymmai lane ban ailad ïa ki ban bteng naduh ka Semester ba ki don mynta.
Ka Seng ka phah ruh ïa u kyrwoh sha ki samla pule ba kin phah ïa ki jingtip ba kham bniah sha ka Seng da kaba phah ïa ka kyrteng, ka Course Contents, Registration Number bad ki Department ba ki pule khnnang ba ka KSU kan ïoh ban phah ïa ki kyrteng sha ki bor pynïaid jong ka NEHU.
