Pan jingpynshai ka KSU na u EE PWD halor ka jingpyntrei ïa ka surok Borghat-Sonapur

Khliehriat, Naiwieng, 13: Ka Khasi Students’ Union (KSU) South West Border Circle hapoh ka jingïalam u Publicity Secretary ka KSU East Jaiñtia Hills District Unit u Bah Hamewanpynhun Ryngkhlem bad u Education Secretary KSU- South West Border Circle, u samla Andrias Talang ha ka sngi Palei ki la leit ban ïakynduh ïa u Executive Engineer ka tnat PWD (Roads) Khliehriat bad pan jingpynshai halor ka jing pyntrei ïa ka surok Borghat–Sonapur.
Kane ka jingpang jingpynshai jongka seng ka long hadien ka jingmih khubor ba ka Ministry of DoNER ka la pyllait ïa ka pisa ha kaba ïadei bad ka jingtrei ïa ka surok Borghat-Sonapur.
“Ka jingleit jong ka seng ban ïakynduh ïa u Executive Engineer PWD ka long katkum ba paw ha ki lad pathai khubor ba na ka bynta ka surok Borghat-Sonapur ladep ban pyllait ïa ka mang tyngka ban pyntrei hynrei ka jing pyntrei pat ka long beit tang na Wahprang – Hingaria haduh Sonapur,” la ong ka seng.
“Hadien ba ka seng ka la ïoh ban ïakren bad u EE ka la sngewthuh ba ka tnat PWD Khliehriat kam pat shym la ïoh pdiang lut ïa ka pisa na ka Ministry of DoNER bad ha kajuh ka por u EE u la pynshai ba ka Ministry of DoNER ka khlem bei pisa eiei ruh ban pyntrei ïa ka surok na Borghat shaduh Sonapur hynrei ka long ba tang na Sonapur haduh Wahprang-Hingaria bad na Wahprang Hingaria haduh Borghat la pyntrei na ka pisa kaba dei ka State Fund lane ka State Scheme bad ka jingtrei ka dang ïaid shakhmat bad ka surok ruh ka long kaba rit ym kum ka surok na Wahprang-Hingaria shaduh Sonapur ba ka jingheh ka surok ruh ka long kaba heh,” ong shuh shuh ka seng.
Lyngba u kyrwoh ka seng ka la pynpaw ruh ha kaba ïadei bad ka jingpyntrei ïa ka surok na Wahprang-Hingaria shaduh Borghat, namar wat haba ïa ka surok ladep ban pyntrei dang shen hynrei ki don ki bynta jong kane ka surok kaba la sdang ban joit ban pei. Ka seng ka la kyrpad ïa u EE ba un tuklar lem ïa kane ka kam bad u EE ruh u la kular ba un sa bthah ïa u Kontraktor ban maramot pynbha noh ïa ki bynta ba la julor.
Ka seng ka la ai khublei ïa u EE ka PWD Khliehriat uba la shimkhia ïa kane ka kam bad kumjuh ïa ka MLA ka Kong Santa Mary Shylla kaba la shimkhia ïa kane ka kam
Ka Seng ka kyrpad ïa ka MLA ba kan tuklar bad ban bud dien ïa kane ka kam khnang ba ka jingpyntrei kan long kaba ïaid beit ïaid ryntih bad ba ki Kontraktor ruh kin pyntrei bha katkum ba la ka mang da ka Sorkar khnang ba kan long ka jingkyrkhu ïa ka thaiñ khappud baroh kawei.