Pan jingpynshai ka Dorbar Shnong Hingaria ba shah pynduh ïa ka Sub-Center ba ladep mang

Khliehriat, Rymphang 01: Ki Nongïalam Shnong jong ka Shnong Hingaria, East Jaiñtia Hills District, myn ha ka 30 tarik u kyllalyngkot ki la leit buh da ka jingthoh bad pan jingpynshai ruh na u District Medical Health Officer ka East Jaiñtia Hills District halor ka jingshah pynkynriah noh (Relocate) ïa ka Sub-Centre kaba la mang ban shna na duh ka samoi 2023-2024 (Approval Year 2023-2024).
Ki Nongïalam shnong na Hingaria ki la ong ba kat haduh mynta na ka liang ka office jong u DM&HO ka khlem pat pyntrei ei ei ruh wat la na ka liang ka Shnong ka la ai Sngewbha ïa ka jaka ban shna ïa katei ka Sub-centre, ha ka jingshisha ka shnong Hingaria ruh ka dei kawei na ki shnong kaba la rung ha ka thup kyteng kaba la bhah ban ioh ïa ka Sub Center kaba yn shna lyngba ka PM- ABHIM Meghalaya ki shnong kiba paw kyrteng ha ka thup ki dei ka shnong Daistong, Saibual, Byrwai, Umsatai, Lamyrsiang, Jalaphet Bri sumer, Moolang, Kulpui bad Hingaria, hynrei ha shnong Hingaria pat ym pat shym la pyntrei satia.
Ki Nongïalam shnong, haba ki la pyrshang ban ïakren bad pan jingpynshai na ka liang u DM&HO, u Dr D.Shylla u la iathuh ba ïa kane ka sub-centre ka sorkar ka la pynkynriah noh sha ka wei pat ka District da ka ba ai daw ba ka jaka ba ka dorbar Shnong ka ai kam pat biang, te kumta ïa kane ka Sub-centre la kynriah pat sha kiwei ki jaka.
Kane ka long ka ei ka ei ka ba la lyngngoh ïa ki Nongïalam shnong wat haba na ka liang ka ka Shnong kam tip ei ei shaphang kata ka jingbym dap lane jing bym pat biang ka jaka ba la ai ka shnong bad na ka liang ka office DM&HO ki khlem ai jingtip ei ei sha ka shnong hynrei ki la shu leh da ka bor ban pynkynriah bad pynduh ïa katei ka Sub-centre kaba na ka liang ki nongshong shnong ki la ap khmih lynti la slem.
Ka Shnong Hingaria ka don ha khappud bad ka ri Bangladesh bad ba jngai da ki spah kilometre ban poi sha ki jaka sumar bad ka jingbun paid kam duna shuh sha ka 2000 tam eiei hynrei ha ba phai pat ha ka liang ka koit ka khiah khamtam ha ki por mynshwa ki briew kim banse ban jam sha shiliang u pud ka Ri India ban leit wad ki jingsumar namar ha kito ki por ka lynti synkien ruh kam pat biang ban leit shaduh Khliehriat, Jowai lane shillong hynrei pynban na ka liang ka sorkar wat ha duh mynta ruh ka khlem pat phai khmat sha kine ki thaiñ khamtam ha ka ba ïadei bad ka koit ka khiah.
Kum ban shu pynkynmaw na ka liang ka sorkar ha u snem 2023-2024 ka la pynbna ïa ka mang tyngka lane sanction na ka bynta katei ka Sub-centre ha Shnong Hingaria ha poh ka scheme PM-ABHIM (2nd Phase), ha kito ki por na ka liang ki nongshong shnong ki la ïa kmen bad ai ka jingiaroh ïa ka sorkar ba ka la phai khmat ban weng noh ïa ki jingeh jong ki nongshong shnong ha ka ba ïadei bad ka koit ka khiah, hynrei ka pynkyndit pynban ba mynta ka sorkar lymba ka office DM&HO ka la pynkynriah ïa katei ka jingthmu da ka ba ai daw ba ka jaka kam biang wat la na ka liang ka dorbar Shnong kam tip ei ei shaphang kata ka jingbymbiang ka jaka. Lada ka office DM&HO lane ka Health Department ka ai ka jingtip sha ka shnong, ka Shnong ka don bun ki jaka ban ai wat ki riew shimet ruh ki kloi ban ai Sngewbha ïa la ki jong ki jaka sha ka tnat ka koit ka khiah ban shna Sub-centre na ka bynta ka jingbit jingbiang ki nongshong shnong ha ka ba ïadei bad ka koit ka khiah.
Ki Nongïalam shnong ki la ong ruh ba namar ba ka rukom ai jingpynshai na ka liang ka office DM&HO kam long ka ba shai bad kam dei kaba don nongrim ha ei ha ei ruh, kumta Dorbar Shnong Hingaria ka la rai ba kan iaid sha khmat ban shim da kiwei pat ki lynti lada dei ban leit iakynduh bad u myntri ka koit ka khiah ka jylla ruh kin leit bad kin iaid wat da ka lynti jong ka aiñ ruh khnang ba ïa ka hok ki nong shong Shnong ba la mang da ka sorkar kam dei ban duh ong u Waheh Shnong Hingaria u bah Ting Khonglah.