Pan jingkyrshan u Bah Sounder S. Cajee na ki paidbah ka Mawkyrwat Constituency ban ïakhun ha ka elekshon 2023

Mawkyrwat, Jylliew 05: Ka jingïalang jong ka kynhun ba la lamkhmat da u bah Sounder S. Cajee ha ka sngi saitjaiñ jong ka taïew ka 4 tarik u Jylliew, 2022 ka la ïoh ban pynlong ka jingïalang paidbah ha kaba da ki hajar ngut ki paidbah ki la tuid ban sngap ïa kaei kaba na ki liang ki nongïalam kin rai na ka bynta ka elekshon ha u snem 2023 napoh ka 36-Mawkyrwat Constituency ha kaba ïa ka jingïalang la pynlong hapoh ka Madan jong ka Nativity Higher Secondary School, Mawkyrwat.
Ha kane ka jingïalang u bah Sounder S. Cajee haba ai jingkren u la ïathuh ba kane ka jingïalang kam dei ka jingïalang jong kano kano ka seng saiñ pyrthei (party) hynrei ka dei ka jingïalang ban khot ïa ki paidbah kiba kwah ne don ka mynsiem ban wanrah ïa ki jingkylla ha kiba bun ki liang. U la pynshai ruh ba haduh mynta um pat don kano kano ka seng ba un sa ïaleh ne ba un ïeng kum u kyrtong hynrei u la kren da kaba shai ba lada un ïoh un nym ïa khun na ki National Party pynban un ïeng beit na ki Party Riewlum. U la ong ruh ba ban leh ne ban ïaid shakhmat ïa kata, kam shong eh ha ka mon jong u marwei hynrei ka shong ha ka jing-i-mon lang jong ki paidbah kiba long ki païa ban pynjop ne pynrem ïa ki kyrtong. “Lada nga kwah eh ban ïeng hynrei ki paidbah pat kim mon nga ruh nga kloi ban shong noh khlem trei shuh”, ong u bah Sound.
U bah Sounder u la ong ruh ba kane ka 4 tarik u bnai Jylliew, 2022 haba u la khot sngewbha ïa ki paidbah u khlem ong ïa ki paidbah ba u khot ha ka kyrteng jong ka Congress, ka HSPDP, UDP, PDF, lane kiwei kiwei ki seng saiñ pyrthei hynrei u khot sngewbha bad u lum ïa ka jingïalang ha ka kyrteng “Bah Sounder S. Cajee bad ka kynhun treikam”. Namarkata, kane ka sngi ka long ka sngi jong ka jingsah jingkynmaw ha ka history jong ka Mawkyrwat Constituency ba ha kine ki sngi ba la dep u la shah kren beiñ da ki kyntien ba ki ong, “u nongwei” hynrei mynta ka sngi la la long ka sakhi.
“Ban rai ïa kano kano ka kam, kam shong ha nga marwei hynrei ka dei lyngba ka jingai bad ka jingïasnohktilang jong u paidbah”, ong u bah Cajee. U la ong ruh ba kum ka kynhun nangne shakhmat lada ki la ïoh ïa ka rai kaba skhem kin sa wan biang sha u paidbah ban twat jingmut bad hangta kin sa ïa rai lang ban pynskhem na ka bynta ban tyllun ïa ka kam na ka bynta ka thma elekshon jong u snem 2023 napoh ka 36 – Mawkyrwat Constituency.
U bah Sounder ha kane ka sngi u la kren ruh ïa ki ar tylli ki mat kiba kongsan kawei kaba ïa dei bad ka imlang ka sahlang namar ka synshar khaddar ha ki shnong ki thaw ka la synjor haduh katta katta bad ha kane ka bynta ka la don ka jingbakla ha ka pyrkhat pyrdaiñ ha kaba bunsien ki jingsniew ki la sdang ban jyllei haduh katta katta bad mynta ka la donkam kyrkieh ïa ki nongïalam kiba shisha ba kiba lah ban wanrah ïa ka jingbha. Kaba ar ha ka khaïi ka pateng ïa kaba bunsien ma ngi ki paidbah jong ki shnong ki thaw ngi ju bam tang da ki jhur ki jhep, ka dohkha dohpnad ym kaba mih na la ki jong ki jaka hynrei ki dei ki mar kiba la wanrah na shabar jong ka jylla (kum ka dohkha ka dei ka dohkha ba la wanrah naduh na Andra Pradesh).
Namarkata, u la kyntu na ka bynta ki nongmihkhmat ba kin thaw ki lad ki lynti da kaba wan ki lad jingïarap ba ki samla jong ka jylla kin nym kut tang ha ka kyntien kaba ong, “la kyrduh kam la kyrduh jam”, hynrei da ka jingseng ïa shibun ki kynja ‘farm’ lyngba ki skhim jong ka sorkar kan sa long kawei na ki bynta ban plie lad ïa ki samla ba kin pyntyllun ha kiba bun ki kam.
Ha ka jingkren jong u u la ai ruh shibun kiei kiei da kaba pynphalang ruh ïa ki katto katne ki mat kiba dei ki kam pynroi kiba u (L) Rowell Lyngdoh, Symbud Myntri ba rim jong ka Jylla Meghalaya ïa kiba u la leh bha ïa ka Mawkyrwat Constituency bad ïa ka South West Khasi Hills District baroh kawei.
Kumta ha kaba kut jong ka jingkren jong u u la kyntu ïa ki paidbah ba haba jied ban long ki nongïalam dei ban jied da ki briew kiba ieit bad kiba don ka mynsiem jong ka jingïarap, u nongïalam u ba lah ban wanrah ïa ka roi ka par kumba la pynpaw ki dak ki shin bad ki matti jong u (L) Rowell Lyngdoh.
Ha kajuh hi ka sngi la ïoh ban seng bad pynskhem ruh ïa ki nongkitkam ba hakhmat eh jong ka Mawkyrwat Constituency Socio Economic & Political Awareness Committee (MCSEPAC) ha kaba u bah Sounder S. Cajee kum u President bad u bah Remdor Shylla kum u General Secretary. Kumjuh u samla Benjohnson Lyngdoh kum u President bad u samla Thomas Thyrniang kum u General Secretary jong ka Youth Wing, nangta ka kong Lumsuk Marngar kum ka President, ka kong Ridalinshisha Wanniang kum ka Working President, ka Ailinda Tongwah kum ka Vice President bad ka Jubilin Lyngdoh kum ka General Secretary ha kaba ïa kine baroh la ïoh ban pynskhem da u bah Diverland Lyngdoh.
La pynphuh pynphieng ïa kane ka sngi da ki jingrwai kyrpang na u bah P. Syiemlieh, na ka samla Ilawanrihun Lyngdoh bad kumjuh ruh na ka samla Dasming Lyngkhoi.
Ïa ka jingïalang la pynïaid da u bah Remdor Shylla, ka jingdwai na u bah E.B. Lyngdoh (Tymmen Basan), ka jingkren pdiang na u samla Benjohnson Lyngdoh, ka jingkren lyngkot na u bah Bokstone Thongni, na u bah Diverland Lyngdoh bad ka jingkren khublei na ka kong Jubilin Lyngdoh.