Pan jingïarap pisa ka tnat Bording ban pyntreikam ïa ki projek thymmai ba kot T. 2270 klur

Shillong, Naitung 08: U Myntri ka tnat Bording ka jylla Meghalaya bad u chairperson of North Eastern Regional Power Committee (NERPC) u Abu Taher Mondal u la kyrpad ïa ka jingïarap pisa napoh ka Ministry of Power ban kyrshan ïa ki projek transmission ha kane ka thaiñ shatei lammihngi, kynthup ïa ki projek kiba dang tyrwa thymmai kiba shongdor T. 2270 klur.
U la banjur halor ka jingdonkam ban pynïoh ïa ka 132 kV line sha ki thaiñ khappud bad ka ri Bangladesh khnang ban lah ban pynbha ïa ka jingsam bording sha kane ka thaiñ.
Ïa kine ki jingkyrpad la phah sha u chairperson ka Central Electricity Authority u Ghanshyam Prasad, uba dei ruh u chairman ka National Power Committee (NPC) ha ka jingïalang kaba dang shen jong ka 16th NPC kaba la long ha Courtyard Marriott Shillong hapoh ka jingbei tyngka ka NERPC.
“Ka jylla ka la pynkhreh ïa kane ka transmission plan kaba la mynjur da ka CEA. Kane ka project thymmai kaba dang sdang kan ïarap ban kyntiew ïa ka jingsam bording kaba bynrap kaba 760 MVA bad ka jingkyntiew ïa ka jingïar ka line jong ka 190 Ckt km ha kaba ka pisa kaba donkam ka long T. 2270 klur,” ïathuh u Mondal sha ki lad pathai khubor ha ka sngi baar.
“Watla na ka bynta ki katto katne ki project, ka la don ka jingpynkhreh ïa ka fund da ka sorkar jylla bad ka Ministry of DoNER hynrei na ka daw ka jingduna ka pisa ngi la kyrpad ïa ka CEA ba kan shim khia lem ïa kane ka kam bad ka Ministry of Power ba kan pynïoh ïa ngi katto katne ka jingïarap pisa ba ïadei bad ki line program kiba dang ïaid mynta ha ki jylla ka thaiñ shatei lammihngi. Kane kan pynsting ïa ka jingduna ka pisa bad kan ïarap ïa ngi ban ïoh ïa kane ka transmission line,” u la bynrap.
U Myntri u la ïathuh ruh ba u la rah ïa kane ka jingdonkam ka transmission na ka bynta ki jylla kane ka thaiñ shatei lammihngi bad ka Sikkim haduh ka snem 2031-32 bad ka jingdonkam ka jingïarap pisa na ka Ministry of Power.
U Myntri u la kyrpad ruh haba ïadei bad ka jingdonkam ka 132 kV line sha ki thaiñ khappud bad ka ri Bangladesh, ba kynthup ïa ka Baghmara bad kiwei ki jaka sor, ban pynbha ïa ka jingsam ïa ka bording bad ki jingthmu ba kongsan.
“Nga la kyrpad ïa u Chairman ka CEA ban ïarap ïa ngi ban pynïoh ïa ka 132 kv line sha ka thaiñ Baghmara bad kiwei ki jaka sor kiba don ha khappud ka ri Bangladesh. Kane kan ïarap ïa ngi ha kiba bun ki liang ba kynthup ïa ki jingthmu ba kongsan bad lada don pat kino kino ki jingjia ba thut ka bording yn lah ban pyndonkam da kane ka line. Mynta kaei kaba jia ka long ba ngi don ïa ka 132 kv line kaba ïaid lyngba ka khlaw kaba la tyngkai, ki hati ki jam lyngba ka crossing zone, kan long kaba eh ban khmih bad ban pynkhuid ne ban weng ïa kane ka jingeh. Shisien ba ngi la ïoh ïa ka 132 kv line kan sa pynsting ïa baroh ki jingeh,” u la bynrap.
U Myntri u la pynpaw ruh ka jingdonkam ban kyntiew ïa ki transmission line ha ki thaiñ ka South Garo Hills, West Garo Hills, bad South West Khasi Hills.
“Ngi dang wad ki lad ki lynti ba kane ka 132 kv line yn lah ban rah sha kine ruh ki thaiñ,” u la ong.
Shuh shuh u Mondal u la pynbna ba ka tnat ka la dep ïoh ka jaka ban buh ïa ka 132 kv sub station ha Nongpoh ka ban pynsuk ïa baroh ki jingeh jong ka kam transmission bad kiwei pat ki kam ba ïadei bad kane na ka bynta ka Ri Bhoi district.
Ha ka jingïalang ka NPC, u Myntri u la rah ïa kane kam kaba dang sahteng ban ïoh ki jingmynjur na ka bynta ki project kiba hapoh ka Power System Development Fund (PSDF) na ka bynta ki jylla kane ka thaiñ shatei lammihngi, kaba la suki noh halor ka jingthmu ban kyntiew ïa ka SCADA EMS system.
“Ngi la tip bha ba ka la don ka jingma na ka cyber ha kaba ïadei bad ka kam bording bad ïa kane ruh donkam ban pynbha,” u la bynrap.
U Myntri u la ïakren ruh halor ka jingdonkam ka common accounting software na ka bynta baroh ki thaiñ ban pynbha ïa ki rukom treikam kiba shai bad kiba ïaid beit.
U Mondal u la pyntip ba u Chairman ka NPC bad CEA ki la sngap bad shah shkor bha ïa ki jingkyrpad u Myntri bad la mynjur ba ïa kine ki jingdonkam yn leit rah sha ka Ministry of Power na ka bynta ban ïoh ki jingïarap pisa bad ki jingkyrshan.