Pan jingïarap ka Umshaken Christian UP School na u MLA ban pynioh building thymmai

Nongpoh, Naitung 08: Kum kawei naki skul kaba la don kumba 48 snem bala seng naduh u snem 1974 da ki riew rangbah jong ka Raid Mathan, ki bor pynïaid skul jong ka Umshaken Christian Upper Primary School, mynta ka sngi kila pan jingïarap na u MLA ka Nongpoh u Bah Mayral Born Syiem naka bynta ban pynioh skul building ba paka bad kiwei kiwei ki jingdonkam shuwa ka jingrakhe dap 50 snem jong ka skul haka jingleit iuh kjat jong u MLA mynta sngi sha katei ka thaiñ.
Ha katei ka jingleit iuhkjat jong u MLA ha katei ka shnong, haka jingdonlang ki nongïalam shnong, ki bor pynïaid skul bad ki kmie ki kpa la ioh ruh ban ïathir ïatai halor kumno ban dang wanrah ïaka roi ka par ha katei ka shnong khamtam ban dang kyntiew ïaka pule puthi naka bynta ka jingmyntoi jong ki khynnah pule ba kim donkam ban leit sha ki jaka pule ba sha jngai nala shnong.
Naka liang ki bor pynïaid skul kila pynpaw ruh ba ïa katei ka skul la seng da ki riew rangbah jong ka Raid Mathan naduh u snem 1974 bad kaba sngewsih ka long ba haduh mynta katei ka skul kam pat ioh ka iingskul building kaba paka watla naka liang u MLA u la dep pynmang skhim ban pynbha bad maramot ïa katei ka skul, hynrei kum ki bor pynïaid skul kila pynpaw bala donkam ban ioh da ka building kaba thymmai ha shuwa ka jingrakhe dap 50 snem kaban sa rakhe sa kumba 2 snem eiei.
U Bah Mayral Born Syiem haba kren ha katei ka sngi u la pynpaw baka pule puthi ka long kaba kongsan ha kane ka juk kaba mynta bad kum u MLA u la ïakhun ban wanrah shibun ki kam pynroi ha kine ki 4 snem bala leit noh naka bynta ka jingmyntoi ki paidbah, hynrei ka long kaba donkam ban dang kyntiew ïaka pule ka puthi jong ka thaiñ khamtam haki thaiñ nongkyndong ba katei ka skul kala donkam ban ioh ruh ka building kaba paka katkum ka juk kaba mynta khnang ba kan long ka jingkyrkhu ïaki khynnah pule ka thaiñ.
Kum u MLA u la kular ruh ban shimkhia ïa katei ka jingkyrpad jong ka skul bad ha katei ka sngi kum ka jingnoh synñiang u la aiti ruh ïaki kor pynsawa sha katei ka skul ba kin ioh ban pyndonkam naka bynta ka jingdonkam jong ka skul.